ສະພາບເສັ້ນທາງກາສີ-ເມືອງນານ ການສັນຈອນຕິດຄັດເນື່ອງຈາກມີການຕັດດິນເຂດທີ່ເຈື່ອນ ຫາກຫຼີກລຽງໄດ້ຄວນເວັ້ນໄປທາງອື່ນ

ຜູ້ທີ່ເດີນທາງຜ່ານເສັ້ນທາງກາສີ ໄດ້ຖ່າຍແລະໂພດຮູບເສັ້ນທາງການສີ-ເມືອງນານ ເຂດພູເກົ້າຫຼັກ ລົງສື່ສັງຄົມອອນລາຍ ໂດຍຍົກໃຫ້ເຫັນສະພາບລົດຕິດເນື່ອງຈາກລໍ້ຖ້າການປ່່ອຍລົດ ຈາກການປິດເສັ້ນທາງເພື່ອທຳການຕັດດິນ ແລະ ຈົກດິນ ເພື່ອປັບເສັ້ນທາງເຂດທີ່ດິນເຊາະເຈື່ອນລົງມາ.

ເຮັດໃຫ້ຜູ້ໃຊ້ເສັນທາງດັ່ງກ່າວພົບຄວາມຫຍຸູ້ງຍາກ ແລະ ລໍຖ້າຫຼາຍຊົ່ວໂມງ. ດັ່ງນັ້ນຈິ່ງຝາກເຕືອນຜູ້ທີ່ຈະເດີນທາງຂຶ້ນພາກເຫນືອ ຫລື ຈາກພາກເຫນືອລົງນະຄອນຫຼວງວຽງຈັນ ຄວນຫລີກລຽຽເສັ້ນທາງນີ້

ພ້ອມກັນນັ້ນສັງຄົມກໍຍັງຮຽກຮ້ອງໃຫ້ພາກາສ່ວນທີ່ກ່ຽວຂ້ອງ ຫລື ບໍລິສັດທີ່ຮັບຜິດຊອບປົວແປງເສັ້ນທາງ ໃຫ້ມີການແຈ້ງການລະອຽດເຖິງຂອບເຂດ ແລະ ເວລາໃນການປິດເສັ້ນທາງ ທັງນີ້ກໍເພື່ອໃຫ້ຜູ້ທີ່ຈະເດີນທາງໄດ້ຮູ້ລ່ວງຫນ້າເພື່ອຫລີກລຽງຫລືປຽນເສັ້ນທາງໄປເສັ້ນອື່ນ.

ການທີ່ລົດຈຳນວນຫຼາຍຕ້ອງຈອດລົງຕາມເສັ້ນທາງທີ່ຄ້ອຍຊັນນັ້ນເປັນອັນຕະລາຍທີ່ສຸດ. ແລະເຂດນີ້ກໍເປັນຈຸດສ່ຽງໄພຂອງນັກເດີນທາງເສັ້ນກາສີ-ເມືອງນານ ທີ່ສຸດທີ່ແຕ່ລະປີມີເຫດການລົງປີ້ນແລະເສຍຫລັກຕົກເຫວ ເຊິ່ງສ້າງຄວາມສູນເສຍທັງຊີວີດແລະຊັບສິນເປັນຈຳນວນບໍ່ຫນ້ອຍ

ເຫດການຫລ້າສຸດທີ່ສ້າງຄວາມຕົກໃຈໃຫ້ກັບສັງຄົມກໍແມ່ນລົດໂດຍສານຜົ້ງສາລີ-ນະຄອນຫຼວງວຽງຈັນເກີດອຸບັດຕິເຫດໃນເສັ້ນທາງດັ່ງກ່າວ.

ອີງຕາມເຟສບຸກຄຸ້ມຄອງທາງບົກ ຍທຂ ຫຼວງພະບາງ ເຫັນແຈ້ງການແຕ່ວັນທີ29 ມັງກອນ2018 ວ່າຂະແໜງຄຸ້ມຄອງທາງບົກ ພະແນກ ຍທຂ ແຂວງຫຼວງພະບາງ ຂໍແຈ້ງມາຍັງບັນດາທ່ານທີ່ຈະເດີນທາງຂຶ້ນເໜືອ ລົງໃຕ້ທີ່ຈະນຳໃຊ້ເສັ້ນທາງ ກາສີ - ເມືອງນານ ປະຈຸບັນໄດ້ມີການສ້ອມແປງເສັ້ນທາງດັ່ງກ່າວ ແລະ ຈະໄດ້ປິດເສັ້ນທາງດັ່ງກ່າວເພຶ່ອຕັດດິນ
☆ສ່ວນເວລາເປິດໃຫ້ລົດຜ່ານມີດັ່ງນີ້:
>ຕອນເຊົ້າ: ເວລາ 10 ໂມງ ຫາ 10ໂມງ 30 ນາທີ.
>ຕອນບ່າຍ: ເວລາ 12 ໂມງ ຫາ 13 ໂມງ.
>ຕອນແລງ: ເວລາ 15 ໂມງ ຫາ 15 ໂມງ 30 ແລະ ເວລາ 17 ໂມງ ຫາ 8 ໂມງ ຂອງມື້ຕໍ່ໄປ.
ບໍ່ຮູ້ວ່າປັດຈຸບັນຍັງໃຊ້ການແຈ້ງດັ່ງກ່າວຫລືບໍ່ ຫາກມີການ ປັບປຸງປ່ຽນແປງກໍຄວນແຈ້ງໃຫ້ຊາບຕື່ມຈະເປັນການດີທີສຸດ