ກອງປະຊຸມຄັ້ງທີ 4 ຂອງຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ ຫາລືກຳນົດລາຄາຊົດເຊີຍ ສິ່ງກີດຂວາງ

ກະຊວງໂຍທາທິການ ແລະ ຂົນສົ່ງ ໄດ້ເປີດກອງປະຊຸມຄັ້ງທີ 4 ຂອງຄະນະຊີ້ນຳໂຄງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ຫາ ນະຄອນ ຫຼວງວຽງຈັນ ເມື່ອບໍ່ດົນມານີ້ ໂດຍການເປັນປະທານນຳໂດຍ ທ່ານ ປອ. ບຸນຈັນ ສິນທະວົງ ລັດຖະມົນຕີ ກະຊວງ ຍທຂ, ຫົວໜ້າ ຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ, ທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງ ຍທຂ, ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ. ມີບັນດາທ່ານຮອງລັດຖະມົນຕີ, ທ່ານຮອງເຈົ້າຄອງນະ ຄອນຫຼວງວຽງຈັນ, ບັນດາທ່ານຮອງເຈົ້າແຂວງ, ເຂົ້າຮ່ວມທັງໝົດ 18 ທ່ານ.

ກອງປະຊຸມໄດ້ຮັບຟັງລາຍງານ ບົດບັນທຶກກອງປະຊຸມຄັ້ງທີ 3 ຂອງຄະນະຊີ້ນຳໂຄງການກໍ່ສ້າງທາງລົດໄຟລາວ-ຈີນ ຄັ້ງວັນທີ 25/8/2017, ຮັບຟັງລາຍງານຄວາມຄືບໜ້າການຈັດຕັ້ງປະຕິບັດໂຄງການ ແລະ ຂໍ້ສະເໜີ, ພ້ອມກັນນີ້ບັນ ດາທ່ານຜູ້ເຂົ້າຮ່ວມໄດ້ປະກອບຄຳຄິດຄຳເຫັນ ຮ່າງຄູ່ມືການຊຳລະຄ່າຊົດເຊີຍສິ່ງກີດຂວາງ, ຂໍ້ຕົກລົງວ່າດ້ວຍການ ກຳນົດລາຄາຫົວໜ່ວຍຊົດເຊີຍສິ່ງກີດຂວາງຂອງທ່ານ ເຈົ້າແຂວງໆວຽງຈັນ, ຂໍ້ຕົກລົງວ່າດ້ວຍການກຳນົດລາຄາ ຫົວໜ່ວຍຊົດເຊີຍສິ່ງກີດຂວາງຂອງທ່ານເຈົ້າແຂວງໆ ຫຼວງພະບາງ, ຂໍ້ຕົກລົງວ່າດ້ວຍການກຳນົດລາຄາຫົວໜ່ວຍຊົດ ເຊີຍສິ່ງກີດຂວາງຂອງທ່ານ ເຈົ້າແຂວງໆ ຫຼວງນ້ຳທາ, ບົດບັນທຶກກອງປະຊຸມໃນວັນທີ 1/3/2018 ກ່ຽວກັບງົບປະ ມານຄ່າຊົດເຊີຍສິ່ງກີດຂວາງ, ມູນຄ່າກໍ່ສ້າງທາງເຊື່ຶອມເຂົ້າສະຖານີລົດໄຟ ແລະ ງົບປະມານປະຈຳປີ 2018 ຂອງຄະ ນະຄຸ້ມຄອງໂຄງການ, ຂໍ້ຕົກລົງການແບ່ງຄວາມຮັບຜິດຊອບຂອງຄະນະຊີ້ນຳ.

ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທັງເປັນຫົວໜ້າຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ ກ່າວວ່າ: ມາຮອດປັດຈຸບັນ, ວຽກງານປັກຫລັກໝາຍຂອບເຂດແລວທາງລົດໄຟແຕ່ນະ ຄອນຫລວງວຽງຈັນ-ແຂວງຫລວງນໍ້າທາທີ່ມີຄວາມຍາວທັງໝົດ 409 ກິໂລແມັດແມ່ນສໍາເລັດແລ້ວ 100%. ສໍາລັບການເຈາະອຸໂມງໄດ້ກວ່າ 55 ແຫ່ງລວມມີຄວາມຍາວກວ່າ 48 ກິໂລແມັດ, ກໍ່ສ້າງຂົວ 66 ແຫ່ງ, ສ້າງເສົາຂົວສຳເລັດ 285 ເສົາ, ເຈາະເສົາເຂັມຂົວສໍາເລັດ 4.410 ເຂັມລວມຄວາມຍາວກວ່າ 119 ກິໂລ.

ສ່ວນວຽກອື່ນໆ ເຊັ່ນ: ການກໍ່ສ້າງເສັ້ນທາງເຂົ້າຫາສະຖານທີ່ກໍ່ສ້າງ, ຕິດຕັ້ງສາຍສົ່ງໄຟຟ້າ, ໝໍ້ແປງໄຟ, ກໍ່ສ້າງລະບົບນ້ຳປະປາເຫັນວ່າມີຄວາມຄືບໜ້າຕາມແຜນການວາງໄວ້ ແລະ ຂະນະດຽວກັນກໍພົບບາງບັນຫາຫຍຸ້ງຍາກຈໍານວນໜຶ່ງຄື: ສະພາບດິນຕາມແລວທາງບາງຈຸດເປັນດິນອ່ອນ ແລະ ອົມນໍ້າ ເຮັດໃຫ້ການເຈາະອຸໂມງມີຄວາມລຳບາກ ແລະ ໃຊ້ເວລາດົນ ແລະ ການສະໜອງພະລັງງານໄຟຟ້າໃນບາງຈຸດກໍ່ສ້າງບໍ່ພຽງພໍ ແລະ ໂດຍລວມເຫັນວ່າການກໍ່ສ້າງໂຄງການດັ່ງກ່າວມີຄວາມຄືບໜ້າປະມານ 26%.