ຕາມຂ່າວ ຊີອາໄອ ໃຫ້ຮູ້ວ່າ: ຕອນຮຸ່ງເຊົ້າວັນທີ 19 ມີນານີ້ຕາມເວລາທ້ອງຖິ່ນ, ຄະນະກຳມະການເລືອກຕັ້ງສູນກາງຣັດເຊຍ ໄດ້ເປີດເຜີຍຜົນການລົງຄະແນນສຽງ 95% ຂອງການເລືອກຕັ້ງປະທານາທິບໍດີປະເທດຕົນ, ທ່ານ ວລາດີເມຍ ປູຕິນ ປະທານາທິບໍດີຄົນປັດຈຸບັນ ໄດ້ຮັບຄະແນນສຽງ 76,56% ເຊິ່ງສູງກວ່າຜູ້ສະໝັກຮັບເລືອກຕັ້ງຜູ້ອື່ນໆຢ່າງຫຼວງຫຼາຍ, ສະນັ້ນ, ຈຶ່ງໄດ້ຮັບໄຊຊະນະໃນການເລືອກຕັ້ງປະທານາທິບໍດີຄັ້ງນີ້.
ໂອກາດນີ້, ທ່ານ ປູຕິນ ໄດ້ສະແດງຄວາມຂອບໃຈຕໍ່ປະຊາຊົນທີ່ເຂົ້າຮ່ວມກິດຈະກຳສະຫຼອງຢູ່ໃກ້ສະໜາມແດງທີ່ມົສກູ, ທ່ານກ່າວວ່າ: "ມື້ນີ້, ຜູ້ມີສິດເລືອກຕັ້ງທັງໝົດຂອງຣັດເຊຍ ລ້ວນແຕ່ຂຶ້ນກັບທີມດຽວກັນ ຄືທີມຊາດຣັດເຊຍ. ສິ່ງທີ່ສຳຄັນແມ່ນ ພວກເຮົາຕ້ອງຮັກສາຄວາມສາມັກຄີແລະຮ່ວມກັນກ້າວໄປໜ້າ. ຣັດເຊຍຈະພະຍາຍາມຮັບມືກັບການທ້າທາຍທັງໝົດ ແລະແກ້ໄຂບັນຫາທຸກປະເພດທີ່ຊາດຜະເຊີນ."
ຫຼັງຈາກນັ້ນ, ໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ສຳນັກງານໃຫຍ່ການແຂ່ງຂັນເລືອກຕັ້ງຂອງຕົນ, ທ່ານ ປູຕິນ ໄດ້ກ່າວຕໍ່ນັກຂ່າວບັນດາປະເທດວ່າ, ຣັດເຊຍຍິນດີຂະຫຍາຍການພົວພັນກັບທຸກປະເທດໃນທະວີບຕ່າງໆຢ່າງຕັ້ງໜ້າ ແລະຈາກນັ້ນຈະເປີດຂະບວນການໃໝ່ແຫ່ງການແກ້ໄຂບັນຫາສາກົນ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment