ແຈ້ງການເຝົ້າລະວັງພະຍຸລົມ

ຕາມການຄາດຄະເນຂອງກົມອຸຕຸນິຍົມແລະອຸທົກກະສາດໃນວັນທີ 19 ມີນາ 2018 ນີ້ໃຫ້ຮູ້ວ່າ ໃນລະຫວ່າງວັນທີ 20-25 ມີນາ 2018 ມວນອາກາດເຢັນຈາກປະເທດຈີນຈະແຜ່ລົງມາປົກຄຸມຢູ່ທຸກພາກຂອງປະເທດລາວ ພ້ອມດຽວກັນກະແສລົມຕາເວັນອອກ-ຕາເວັນອອກສ່ຽງໃຕ້ພັດປົກຄຸມພາກກາງຫາພາກໃຕ້ ດ້ວຍກຳລັງແຮງຫາປານກາງ ຊຶ່ງຈະເຮັດໃຫ້ອາກາດເຢັນລົງຢູ່ແຕ່ລະພາກ ພ້ອມຈະມີລົມພັດແຮງ(ພະຍຸທ້ອງຖິ່ນ), ມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ບາງທ້ອງຖິ່ນຢູ່ເຂດພາກກາງຫາພາກໃຕ້.

ໂດຍກົມອຸຕຸນິຍົມ ແລະອຸທົກກະສາດໄດ້ເນັ້ນໜັກສະເພາະບັນດາແຂວງພາກກາງຫາພາກໃຕ້ ໃນລະຫວ່າງວັນທີ 20-25 ມີນານີ້ຈະເກີດມີລົມພັດແຮງ(ພະຍຸທ້ອງຖິ່ນ) ພ້ອມມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ແລະໝາກເຫັບຕົກຢູ່ບາງທ້ອງຖິ່ນ ດັ່ງນັ້ນ, ຈິ່ງແຈ້ງເຕືອນໃຫ້ອຳນາດການປົກຄອງທຸກພາກສ່ວນ ແລະປະຊາຊົນບັນດາເຜົ່າຈົ່ງມີສະຕິ, ຫຼີກລ່ຽງ ແລະຢູ່ຫ່າງຈາກຕົ້ນໄມ້ໃຫຍ່, ບ່ອນເປີດແປນ, ສິ່ງປຸກສ້າງທີ່ບໍ່ໄດ້ມາດຖານ ພ້ອມທັງໃຫ້ຕິດຕາມຂ່າວພະຍາກອນອາກາດຢ່າງໃກ້ສິດໃນແຕ່ລະວັນ.