ຂປລ. ຕາມການລາຍງານຈາກ ໜ່ວຍງານ ກວດກາປ່າໄມ້ ເມືອງຫ້ວຍຊາຍ ແຂວງ ບໍ່ແກ້ວ ໃຫ້ຮູ້ ໃນພິທີທຳລາຍສັດປ່າ ແລະ ຍຶດໄມ້ ທີ່ຜິດກົດໝາຍ ເມື່ອບໍ່ດົນນີ້ວ່າ: ເພື່ອ ເປັນການຕ້ານ ແລະ ສະກັດກັ້ນ ການລັກລອບຕັດໄມ້ທຳລາຍປ່າ, ລ່າສັດນ້ຳ, ສັດປ່າ ໃຫ້ຫລຸດໜ້ອຍຖອຍລົງ ທັງເປັນການອະນຸລັກ ພັນສັດນ້ຳ, ສັດປ່າທີ່ໃກ້ ຈະສູນພັນ, ທັງເປັນການ ປົກປັກຮັກສາພັນໄມ້ ແລະ ປ່າໄມ້ ເຊິ່ງເປັນຊັບພະຍາກອນ ອັນລ້ຳຄ່າຂອງຊາດ ໃຫ້ຄົງຢູ່ ຕະຫລອດໄປ ນັ້ນ ຫ້ອງການກະສິກຳ ແລະ ປ່າໄມ້ເມືອງ ໄດ້ປະສານສົມທົບ ກັບກອງກວດກາປ່າໄມ້ ຂະແໜງປ່າໄມ້ ລົງເຄື່ອນໄຫວກວດກາ ບັນດາຈຸດຫລໍ່ແຫລມ ທີ່ເປັນເປົ້າໝາຍຢູ່ ເມືອງຫ້ວຍຊາຍ.
ຜ່ານ ການລົງກວດກາຕົວຈິງ ສາມາດ ກວດຢຶດສັດປ່າ ແລະ ໄມ້ຄຸ້ມຄອງໄດ້ ຈຳນວນໜຶ່ງ ໃນນັ້ນ ປະກອບມີ ເຫງັນ, ກະຮອກ, ໄກ່ຂວາ ແລະ ໄມ້ຕັບຈຳນວນ 51 ຕັບ, ມີບໍລິມາດທັງໝົດ 3.220 ແມັດກ້ອນ ມີມູນຄ່າ ທັງໝົດ 9 ລ້ານກວ່າກີບ ເຊິ່ງສັດປ່າທັງໝົດ ນັ້ນແມ່ນຖືກເຜົ່າທຳລາຍ, ສຳລັບໄມ້ຈຳນວນດັ່ງກ່າວ ແມ່ນຖຶກຢຶດເປັນຊັບສິນຂອງລັດ ຕາມຂັ້ນຕອນຕໍ່ໄປ. ສ່ວນຜູ້ທີ່ກະທຳຜິດ ຈະຖືກສຶກສາອົບຮົມ ພ້ອມທັງເຮັດບົດບັນທຶກກ່າວເຕືອນ ແລະ ຖຶກ ປະຕິບັດຕາມກົດໝາຍວ່າດ້ວຍ ປ່າ ແລະ ຄຳສັ່ງສະບັບ ເລກທີ 15/ນຍ ວ່າດ້ວຍ ການຍຸດຕິການຕັດ, ຍົກຍ້າຍໄມ້ຢູ່ ໃນລາວ.
ສະນັ້ນ ເພື່ອເປັນການຕອບຕ້ານ ກັບຜູ້ທີ່ຫວັງລັກລອບ ເອົາຊັບສົມບັດ ອັນລວມຂອງຊາດມາເປັນຂອງຕົນ, ເປັນການອະນຸລັກ, ປົກປັກຮັກສາ ຊັບພະຍາກອນ ອັນມີຄຸນຄ່າ ທາງທຳມະຊາດໄວ້ ໃຫ້ຢູ່ຄູ່ກັບຜືນແຜ່ນດິນ ອັນດົມຮັ່ງມີຂອງລາວ ຕະຫລອດໄປ ຮຽກຮ້ອງໃຫ້ປະຊາຊົນ ທຸກຊັ້ນຄົນ ທະຫານ, ຕຳຫລວດ ຈົ່ງພ້ອມຈິດ ພ້ອມໃຈກັນ ເປັນຫູເປັນຕາ ຊ່ວຍກັນຕອບຕ້ານການລັກລອບ ຕັດໄມ້ທຳລາຍປ່າ ລ່າສັດນ້ຳ, ສັດປ່າທີ່ຜິດກົດໝາຍ ໃຫ້ຫລຸດໜ້ອຍຖອຍລົງ ແລະ ໝົດໄປເທື່ອລະກ້າວ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment