ຂປລ. ໃນ ວັນທີ 23 ມີນາ 2018 ຢູ່ຫໍສະຫມຸດແຫ່ງຊາດ ໄດ້ເປີດງານ ນິທັດສະການປື້ມ ຄັ້ງທີ XV ຢ່າງເປັນທາງ, ໂດຍການເປັນປະທານ ຂອງ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີ ພະອາຈານ ເວດ ມະເສໃນ ຮອງປະທານ ອພສ ສູນກາງ, ທ່ານ ນາງ ຂັນທະມາລີ ຍັງນຸວົງ ຫົວຫນ້າ ຫໍສະຫມຸດແຫ່ງຊາດ, ຕາງໜ້າ ພະແນກສຶກສາທິການ ແລະ ກິລາ, ສະມາຄົມຮ່ວມນ້ຳໃຈ ເດັກນ້ອຍລາວ, ພາກສ່ວນທີ່ກ່ຽວຂ້ອງ ແລະ ນ້ອງນັກຮຽນທົ່ວນະຄອນຫລວງ ເຂົ້າຮ່ວມ, ເຊິ່ງງານ ດັ່ງກ່າວ ຈະດຳເນີນໄປເປັນ ເວລາ 2 ວັນ.
ທ່ານ ບົວເງິນ ຊາພູວົງ ກ່າວໃນບາງຕອນ ສຳຄັນວ່າ: ງານນິທັດສະການປື້ມ ໃນຄັ້ງນີ້, ກໍເພື່ອໃຫ້ນ້ອງນັກຮຽນ, ພໍ່ແມ່, ພະສົງ ສາມະເນນ ແລະ ທົ່ວສັງຄົມ ໄດ້ຮັບຮູ້ເຖິງວຽກງານ ການສົ່ງເສີມການອ່ານ,ການຈັດພິມປື້ມ ສຳລັບເດັກ, ປື້ມທັມມະ ແລະ ປື້ມອ່ານ ເພື່ອເສີມຄວາມຮູ້ທົ່ວໄປ ທີ່ທຸກຄົນສົນໃຈ ແລະ ເຫັນໄດ້ ຄວາມຈຳເປັນຂອງການອ່ານ, ມີໂອກາດ ໄດ້ສຳຜັດ ແລະ ຊຶມຊັບ ເອົາຄວາມມ່ວນ, ອອນຊອນ, ຄະຕິທັມ ແລະ ສາລະໜ້າຮູ້ຕ່າງໆ ເພື່ອສົ່ງເສີມ ໃຫ້ທຸກຄົນໃນສັງຄົມມີຄວາມສົນໃຈ ຮັກມັກ ໃນການອ່ານຫລາຍຂຶ້ນ.
ນອກຈາກນີ້, ພາຍໃນງານຍັງມີ ກິດຈະກຳຫລາຍຢ່າງ ເປັນຕົ້ນ ການນຳສະເຫນີປື້ມ, ການສະແດງ ລະຄອນຈາກປື້ມ, ການສະແດງ ລະຄອນເຈ້ຍ, ການເຊີ້ງສົ່ງເສີມການອ່ານ, ສະຖານທີ່ ບໍລິການປື້ມອ່ານ, ສ້ອມແປງປ້ອມ ແລະ ການແຂ່ງຂັນ ອ່ານກາບກອນ, ເລົ່ານິທານ, ສະແດງ ລະຄອນ ແລະ ການຖາມ-ຕອບ ແລະ ກິດຈະກຳອື່ນໆ.
ທ່ານ ບົວເງິນ ຊາພູວົງ ກ່າວຕື່ມວ່າ: ດັ່ງນັ້ນ ຈຶ່ງຢາກເຊີນຊວນ ມາຍັງ ພໍ່ແມ່ປະຊາຊົນ ແລະ ນ້ອງ ນັກຮຽນໃຫ້ພາກັນ ມາຮ່ວມງານນິທັດສະການປື້ມ ທີ່ມີ ຄວາມຫມາຍສຳຄັນ ແລະ ພ້ອມກັນທ່ຽວຊົມ ຫໍສະໝຸດແຫ່ງຊາດ ເຊິ່ງເປັນແຫລ່ງຄວາມຮູ້ ທີ່ສາມາດຕອບສະໜອງ ໃຫ້ແກ່ນ້ອງນັກຮຽນ ທີ່ກຳລັງສຶກສາຫາຄວາມຮູ້ ໄດ້ຈາກຫໍສະໝຸດແຫ່ງຊາດ ສູນລວມ ຂໍ້ມູນຂ່າວສານ, ປະຫວັດສາດ ແລະ ສິ່ງອື່ນໆ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment