ກອງປະຊຸມລັດຖະບານເປີດກວ້າງຄັ້ງທີ 1 ປີ 2018 ຈັດຂຶ້ນໃນວັນທີ 22-23 ມີນາ 2018 ຢູ່ທີ່ຖໍ້າຊ້າງລອດ-ຖໍ້າຫ້ອງການເມືອງບັນຊາການສູງສຸດຂອງກອງທັບປົດປ່ອຍປະຊາຊົນລາວ (1964-1975) ທີ່ເມືອງວຽງໄຊ, ແຂວງຫົວພັນ ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ມີການທົບທວນ ແລະຕີລາຄາຫຼາຍບັນຫາຂອງຊາດ ໃນນັ້ນກໍ່ລວມມີການເກັບລາຍຮັບງົບປະມານ ຊຶ່ງເຫັນວ່າປີ 2017 ຜ່ານມາມີທ່າອ່ຽງດີຂຶ້ນ ຫາກຍັງບໍ່ທັນກະຈາຍສູ່ທ້ອງຖິ່ນ.
ທ່ານ ຈະເລີນ ເຢຍປ່າວເຮີ ຄົກສົກລັດຖະບານໄດ້ຖະແຫຼງຜົນຂອງກອງປະຊຸມລັດຖະບານເປີດກວ້າງຄັ້ງທີ1 ປີ 2018 ໂດຍໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານແຫ່ງລັດ ສົກປີ 2017: ກອງປະຊຸມ ໄດ້ຕີລາຄາວ່າ ການຈັດຕັ້ງປະຕິບັດຕົວຈິງເຫັນວ່າໄດ້ຮັບໝາກຜົນເປັນຢ່າງດີ (ດີກວ່າປີ 2016), ໃນນັ້ນ ໂຕຊີ້ບອກທີ່ສຳຄັນແມ່ນ: ຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ຮັກສາໄດ້ສະຖຽນລະພາບທາງດ້ານການເມືອງ;ເສດຖະກິດແຫ່ງຊາດສືບຕໍ່ຂະຫຍາຍຕົວໃນລະດັບດີ ຄື: 6,9 % (ທຽບໃສ່ແຜນບັນລຸໄດ້ 98,5 %),ການເກັບລາຍຮັບງົບປະມານບັນລຸໄດ້ 22.676 ຕື້ກີບ (94,72% ຂອງແຜນການປີ) ແລະ ການປະຕິບັດລາຍຈ່າຍບັນລຸໄດ້ 30.667 ຕື້ກິບ ( 94,65 % ຂອງແຜນປີ) ການພັດທະນາໂດຍລວມຂອງບັນດາຂະແໜງການ ແລະ ທ້ອງຖິ່ນກໍ່ມີທ່ວງທ່າທີ່ດີ ແລະ ເຫັນໝາກເຫັນຜົນເປັນລຳດັບ.
2). ສໍາລັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃນງວດ 1 ປີ 2018,ເຫັນວ່າ ຢູ່ໃນທ່ວງທ່າດີຂື້ນເມື່ອທຽບໃສ່ໄລຍະດຽວກັນຂອງປີຜ່ານມາ. ອັດຕາເຕີບໂຕເສດຖະກິດ ເຖິງວ່າຍັງບໍ່ທັນສາມາດຄິດໄລ່ອອກເປັນຕົວເລກໄດ້ເທື່ອ, ແຕ່ເຫັນວ່າ ຢູ່ໃນຈັງຫວະທີ່ດີຂຶ້ນກວ່າເກົ່າ, ບັນດາຕົວເລກຄາດໝາຍມະຫາພາກທາງດ້ານເສດຖະກິດ ກໍ່ເຫັນວ່າພວມເປັນໄປຕາມຂອບທີ່ໄດ້ກຳນົດໄວ້; ການເກັບລາຍຮັບງົບປະມານແຫ່ງລັດ ເຖິງວ່າບໍ່ບັນລຸຕາມແຜນງວດ, ແຕ່ກໍ່ເຫັນວ່າເກັບໄດ້ຫຼາຍກວ່າເກົ່າ ເມື່ອທຽບໃສ່ໄລຍະດຽວກັບຂອງປີຜ່ານມາ.
3).ວຽກງານການພັດທະນາຊົນນະບົດ ແລະ ລຶບລ້າງຄວາມທຸກຍາກ ກໍ່ໄດ້ຮັບການເອົາໃຈໃສ່ຢ່າງເອົາການເອົາງານ, ເຖິງວ່າງົບປະມານສຳລັບວຽກງານດັ່ງກ່າວ ຍັງບໍ່ພຽງພໍຕາມຄວາມຕ້ອງການ, ແຕ່ລັດຖະບານ ແລະ ສະພາແຫ່ງຊາດ ກໍ່ໄດ້ພະຍາຍາມຈັດສັນໃຫ້ວຽກງານນີ້ເພີ່ມຂຶ້ນທັງຈາກຊັບພະຍາກອນພາຍໃນ ແລະ ການຊ່ວຍເຫຼືອຂອງຕ່າງປະເທດ. ການຈັດສັນພູມລຳເນົາ ແລະ ສ້າງອາຊີບທີ່ໝັ້ນຄົງໃຫ້ປະຊາຊົນ ເຫັນວ່າມີຜົນສຳເລັດດີສົມຄວນ.
ນອກນີ້ກອງປະຊຸມຍັງໄດ້ຍົກເອົາຫຼາຍບັນຫາຂຶ້ນພິຈາລະນາ ຊຶ່ງລາວອັບເດດຈະທະຍອຍເອົາມານຳສະເໜີເປັນແຕ່ລະປະເດັນໆໄປ.
ຂອບໃຈແຫຼ່ງຂ່າວຈາກ: ວິທະຍຸກະຈາຍສຽງແຫ່ງຊາດ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment