ກຸ່ມກິລາເຕະບານ ເດີຮາດຣ໋ອກ ເອັຟຊີ ຮ່ວມກັບ ສຳນັກງານປົກຄອງເມືອງໂພນທອງ ແຂວງຈຳປາສັກ ໄດ້ຈັດການແຂ່ງຂັນເຕະບານການກຸສົນ 4 ພາກສ່ວນ ເພື່ອລະດົມທຶນ ແລະ ມອບປື້ມ ຈຳນວນ 1.200 ຫົວ ລວມມູນຄ່າ 3 ລ້ານກີບ ຂອງທີມຮາດຣ໋ອກ ເອັຟຊີ ຊຸກຍູ້ໃຫ້ເມືອງໂພນທອງ ເພື່ອນຳໄປມອບຕໍ່ໃຫ້ບັນດານ້ອງນັກຮຽນຈາກໂຮງຮຽນປະຖົມ ແລະ ມັດທະຍົມສຶກສາ ນຳໃຊ້ປື້ມດີໆປະກອບເຂົ້າໃນການຮຽນຮູ້ສ້າງຕົນເອງກາຍເປັນນັກຮຽນເກັ່ງຂອງໂຮງຮຽນ.
ພິທີມອບ-ຮັບການລະດົມອຸປະກອນການສຶກສາ ປື້ມຈຳນວນ 1.200 ຫົວ ໄດ້ມີຂຶ້ນ ເມື່ອວັນທີ 17 ມີນາ ຜ່ານມາ ທີ່ສະໜາມກິລາເຕະບານ ເມືອງໂພນທອງ ແຂວງຈຳປາສັກ ຕາງໜ້າກ່າວມອບແມ່ນ ທ່ານ ສົມໃຈ ຫຼ່ຽມໄຊຍະຈັກ ຮອງກຸ່ມກິລາເຕະບານ ທີມເດີຮາດຣ໋ອກ ເອັຟຊີ ແລະ ຕາງໜ້າກ່າວຮັບຂອງທ່ານ ຂັນຄຳ ສຸລິວົງ ເຈົ້າເມືອງໂພນທອງ, ມີທ່ານ ສຸພາບ ທຳມະຮັກສາ ແລະ ທ່ານ ສີສະຫວັນ ວໍລະລາດ ຮອງເຈົ້າເມືອງໂພນທອງ ແລະ ທ່ານ ຄຳຈັນ ມະນີວົງ ປະທານກຸ່ມກິລາເຕະບານ ເດີຮາດຣ໋ອກ ເອັຟຊີ ຕະຫຼອດຄະນະນຳ, ຄູເຝິກ ແລະ ນັກກິລາ ທັງ 4 ພາກສ່ວນດັ່ງເຂົ້າຮ່ວມເປັນສັກຂີພິຍານ.
ໂອກາດດັ່ງກ່າວ, ທ່ານ ຂັນຄຳ ສຸລິວົງ ກໍ່ໄດ້ສະແດງຄວາມຍ້ອງຍໍຊົມເຊີຍມາຍັງທີມເດີຮາດຣ່ອກ ເອັຟຊີ ຈາກນະຄອນຫຼວງວຽງຈັນ ທີ່ໄດ້ມີນໍ້າໃຈອັນສູງສົ່ງລະດົມອຸປະກອນການສຶກສາເປັນປື້ມ ຈຳນວນ 1.200 ຫົວ ເດີນທາງໄກ ນຳມາມອບຊຸກຍູ້ຊ່ວຍເຫຼືອໃຫ້ບັນດາໂຮງຮຽນທີ່ຍັງຂາດເຂີນດ້ານອຸປະກອນການສຶກສາດັ່ງກ່າວ ຂໍໃຫ້ເຊື່ອໝັ້ນວ່າ ຈຳນວນປື້ມ ແລະ ເຄື່ອງນຸ່ງຮົ່ມຈຳນວນເຫຼົ່ານີ້ ຈະນຳໄປມອບໃຫ້ເຂົາໄດ້ນຳໃຊ້ຢ່າງທົ່ວເຖິງ ແລະ ຫວັງຢ່າງຍິ່ງວ່າໃນຕໍ່ໜ້າ ເມືອງພວກເຮົາຍັງຈະໄດ້ຮັບການຊ່ວຍເຫຼືອແບບນີ້ຕື່ມອີກ.
ຫຼັງຈາກພິທີມອບ-ຮັບສຳເລັດແລ້ວ ໃນບັນຍາກາດດັ່ງກ່າວ ກຸ່ມເດີຮາດຣ໋ອກ ເອັຟຊີ ໄດ້ສົມທົບກັບ ສຳນັກງານປົກຄອງເມືອງໂພນທອງ ກໍ່ໄດ້ຈັດກິດຈະກຳແຂ່ງຂັນກິລາເຕະບານ 9 ຄົນ ນັດພິເສດມິດຕະພາບ 4 ພາກສ່ວນ ລະຫວ່າງ ເຈົ້າຖິ່ນ ທີມວີໄອພີ ເມືອງໂພນທອງ ເອັຟຊີ, ທິບພະຍະປະກັນໄພ ເອັຟຊີ, ທີມຕູ່ ແອນ ຕູ່ ເອັຟຊີ ແລະ ທີມເດີຮາດຣ່ອກ ເອັຟຊີ. ການແຂ່ງຂັນຈັບປະຫຼາກປະກົບຄູ່ແຂ່ງຂັນຄັດເອົາທີມຊະນະຜ່ານເຂົ້າໄປຊີງຊະນະເລີດ ແລະ ທີມເສຍ ໄປຊີງອັນດັບທີ 3.
ຜ່ານການແຂ່ງຂັນຜົນປາກົດວ່າ ໃນຮອບຄັດເລືອກທຳອິດ ທີມວີໄອພີ ເມືອງໂພນທອງ ສາມາດໄລ່ຕີສະເໝີ ທີມເດີຮາດຣ໋ອກ ເອັຟຊີ 2-2 ປະຕູ ຄົບເວລາ 60 ນາທີ (ຕັ້ງລະ 30 ນາທີ) ຕ້ອງມາດ່ວນຈຸດໂທດ ແລະ ເປັນທີມວີໄອພີ ເມືອງໂພນທອງ ເປັນຝ່າຍເອົາຊະນະ 3-1 ປະຕູ ລວມຜົນ 6-3 ປະຕູ ໄດ້ຜ່ານເຂົ້າໄປຊີງຊະນະເລີດພົບກັບ ທີມຕູ່ ແອນ ຕູ່ ແລະເປັນທີມຕູ່ ແອນ ຕູ່ ໄລ່ເອົາຊະນະ 2-0 ປະຕູ ຄວ້າແຊ໋ມລາຍການນີ້ໄປຄອງ ສ່ວນທີມເມືອງໂພນທອງ ໄດ້ພຽງອັນດັບທີ 2 ແລະ ອັນດັບທີ 3 ຕົກເປັນຂອງທີມເດີຮາດຣ່ອກ ເອັຟຊີ ຫຼັງຈາກຊະນະ ທີມທິບພະຍະປະກັນໄພ ໄປແບບຫວຸດຫວິດ 2-1 ປະຕູ.
ສໍາລັບປື້ມຈຳນວນ 1.200 ຫົວ ທີ່ນຳໄປມອບໃຫ້ເມືອງໂພນທອງໃນຄັ້ງນີ້ ແມ່ນສາມາດລະດົມໄດ້ຈາກນໍ້າໃຈຂອງຄອບຄົວທ່ານ ອະໂນໄທ ເມືອງມະນີ ຈຳນວນ 600 ຫົວ ແລະ ຂອງອ້າຍນ້ອງນັກກິລາເຕະບານທີມຮາດຣ໋ອກ ເອັຟຊີ ຈຳນວນ 600 ຫົວ.
ນອກຈາກນັ້ນ, ກໍ່ຍັງມີການຊຸກຍູ້ເງິນຈຳນວນ 3 ແສນກີບ ຈາກສະໜາມເຕະບານຫຍ້າທຽມ ຊ້າງເອັຟຊີ ບ້ານຊ້າງຄູ້ ແລະ ເຄື່ອງນຸ່ງຮົ່ມຕ່າງໆ ມອບໃຫ້ເມືອງໂພນທອງ ເພື່ອນຳໄປມອບຕໍ່ໃຫ້ບັນດານ້ອງໆນັກຮຽນ ແລະ ພະນັກງານ, ຄູ-ອາຈານ ຢູ່ຕາມໂຮງຮຽນຕ່າງໆພາຍໃນເມືອງງດັ່ງກ່າວ.
ແຫລ່ງທີ່ມາຈາກທີມເດີຮາດຣັອກ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment