ເນື່ອງໃນໂອກາດບຸນປີໃໝ່ລາວທີ່ໃກ້ຈະມາຮອດນີ້ທາງສວນວັດທະນະທຳຊຽງຄວນ ໄດ້ມີການກະກຽມຄວາມພ້ອມ ແລະ ຈັດກິດຈະກຳຫຼາຍຢ່າງຮອງຮັບນັກທ່ອງທ່ຽວໃນໄລຍະດັ່ງກ່າວ.
ທ່ານ ນາງ ສ້ອຍສຸດາ ອິນເມືອງໄຊ ປະທານ ບໍລິສັດ ທ່ອງທ່ຽວ ແລະ ການລົງທຶນສາກົນ ລາວ ຈຳກັດ, ຜູ້ສຳປະທານສວນວັດທະນະທຳຊຽງຄວນ ກ່າວວ່າ: ບຸນປີໃໝ່ລາວຖືວ່າເປັນບຸນໃຫຍ່ຂອງລາວເຊິ່ງມີຄວາມໝາຍຄວາມສຳຄັນທີ່ບົ່ງບອກເຖິງການຮັກສາຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ; ໃນໄລຍະຜ່ານມາທີ່ສວນວັດທະນະທຳຊຽງຄວນກໍ່ມີນັກທ່ອງທ່ຽວເຂົ້າມາຫຼາຍໃນມື້ບຸນປີໃໝ່ລາວ ສຳລັບປີນີ້ຄາດວ່າຈະມີນັກທ່ອງທ່ຽວເຂົ້າມາທ່ຽວຫຼາຍກວ່າເກົ່າ.
ສຳລັບກິດຈະກຳທີ່ທາງສວນວັດທະນະທຳຊຽງຄວນຈະຈັດຂຶ້ນ ສະເພາະໃນມື້ວັນທີ 9 ເມສາ 2018 ແມ່ນຈະໄດ້ມີການຈັດພິທີໃສ່ບາດພະ 9 ອົງໃນຕອນເຊົ້າ ໂດຍເຊີນການນຳຂັ້ນເມືອງ ແລະ ນະຄອນຫຼວງວຽງຈັນເຂົ້າຮ່ວມ. ນອກຈາກນັ້ນ, ກໍ່ຈະມີພິທີສູ່ຂວັນມັດຄໍ່ຕໍ່ແຂນໃຫ້ກັບຜູ້ໃຫຍ່ທີ່ເຂົ້າມາຮ່ວມ, ມີການສົມມາ, ການສະແດງສິລະປະ - ວັນນະຄະດີລາວເດີມ ແລະ ພິທີມ່ວນຊື່ນຕາມປະເພນີ.
ສ່ວນກິດຈະກຳໃນມື້ວັນທີ 14 - 15 - 16 ເມສາ 2018 ຕັ້ງແຕ່ເວລາ 13:00 - 16:00 ໂມງ ຈະມີກິດຈະກຳຮ້ອງເພງຈາກບັນດາສິລະປິນລາວ, ການສະແດງສິລະປະ - ວັດທະນະທຳຕ່າງໆ. ພິເສດສຳລັບປີນີ້ທາງສວນແມ່ນໄດ້ມີການນຳເອົາພະພຸດທະຮູບເຂົ້າມາຫຼາຍໃຫ້ນັກທ່ອງທ່ຽວໄດ້ສົງພະ ເພື່ອເປັນສີລິມຸງຄຸນ ແລະ ກໍ່ຍັງມີການກະກຽມນ້ຳສົງພະໄວ້ບໍລິການແກ່ນັກທ່ອງທ່ຽວໂດຍບໍ່ເສຍຄ່ານຳອີກ.
ນອກນັ້ນ, ກໍ່ຍັງມີຮ້ານຂາຍເຄື່ອງສິນຄ້າໂອດ໊ອບຂອງເມືອງ, ມີກິດຈະກຳຕົບພະຊາຍ ຫຼື ກໍ່ພະທາດຊາຍທີ່ແຄມຂອງ ທີ່ເພິ່ນໄດ້ກະກຽມໄວ້.
ພາຍຫຼັງ ບໍລິສັດ ທ່ອງທ່ຽວ ແລະ ການລົງທຶນສາກົນ ລາວ ຈຳກັດ ເຂົ້າສໍາປະທານສວນວັດທະນະທໍາຊຽງຄວນ ກໍ່ໄດ້ເລີ່ມການພັດທະນາ ແລະ ປັບປຸງມາແຕ່ເດືອນສິງຫາ 2017 ໂດຍມີຫຼາຍຢ່າງທີ່ສ້າງຄວາມແປກໃໝ່ໃຫ້ຜູ້ເຄີຍເຫັນແລ້ວຕ້ອງໄດ້ໄປເບິ່ງອີກ ເພື່ອສໍາຜັດເຖິງຄວາມແຕກຕ່າງ ເປັນຕົ້ນແມ່ນການກໍ່ສ້າງປະຕູໂຂງ ແລະ ກຳແພງອ້ອມສວນທີ່ເປັນເອກະລັກທາງວັດທະນະທຳ; ປະຕິສັງຂອນພະພຸດທະຮູບວັດຖຸບູຮານ ເພື່ອໃຫ້ຄົງຢູ່ ແລະ ມີຄວາມສວຍງາມຕາມສະພາບເດີມ; ປັບປຸງ ແລະ ກໍ່ສ້າງເສັ້ນທາງຍ່າງພາຍໃນສວນ; ກໍ່ສ້າງສວນສາທາລະນະ, ປູກຫຍ້າ ແລະ ຕົ້ນໄມ້ປະດັບ;
ກໍ່ສ້າງຮ້ານຂາຍເຄື່ອງທີ່ລະນຶກ, ຮ້ານອາຫານ, ເວທີສະແດງເພື່ອຮັບໃຊ້ແຂກທີ່ມາທ່ຽວ; ກໍ່ສ້າງຫ້ອງນ້ຳສະອາດ; ປັບປຸງສະຖານທີ່ຈອດລົດ ແລະ ສິ່ງອຳນວຍຄວາມສະດວກອື່ນໆ ໂດຍກ່ອນໜ້ານີ້ ທ່ານ ນາງ ສ້ອຍສຸດາ ໄດ້ໃຫ້ຮູ້ວ່າ: ໄດ້ມີການປັບປຸງເສັ້ນທາງຍ່າງຢູ່ໃນສວນ, ການຕົກແຕ່ງສວນດອກໄມ້, ຫ້ອງນ້ຳສະອາດ 18 ຫ້ອງ ແລະ ອື່ນໆ. ພ້ອມນັ້ນ, ໄດ້ມີການກໍ່ສ້າງກຳແພງອ້ອມຮອບທັງ 4 ດ້ານ, ກຳແພງຂັ້ນກາງລະຫວ່າງເຂດມໍລະດົກກັບເຂດເສດຖະກິດ ເຊິ່ງຈະໄດ້ມີການຕົກແຕ່ງລວດລາຍຂອງກຳແພງໃຫ້ເປັນເອກະລັກ ແລະ ຈະມີພະພຸດທະຮູບຈຳນວນ 60 ອົງ ປະດິດສະຖານໄວ້ຢູ່ເທິງກຳແພງ ຄາດວ່າຈະໃຫ້ສຳເລັດກ່ອນປີໃໝ່ລາວ.
ນອກຈາກນັ້ນ, ກໍ່ຍັງຈະສ້າງສວນຫຍ້າ, ບ່ອນຫຼິ້ນຂອງເດັກນ້ອຍ ແລະ ຮ້ານອາຫານທີ່ແຄມຂອງ ເພື່ອໃຫ້ນັກທ່ອງທ່ຽວໄດ້ຊົມບັນຍາກາດແຄມຂອງໄດ້ສະດວກ. ການເຂົ້າມາພັດທະນາໃນຄັ້ງນີ້ແມ່ນບໍລິສັດເປັນຜູ້ລົງທຶນເອງທັງໝົດ ເຊິ່ງມີອາຍຸສຳປະທານ 30 ປີ ໃນເນື້ອທີ່ທັງໝົດ 21 ພັນກວ່າຕາແມັດ ໂດຍໃຊ້ງົບປະມານເຂົ້າໃນການປັບປຸງ 5 ລ້ານໂດລາສະຫະລັດ ຫຼື ປະມານ 40 ຕື້ກີບ.
ສຳລັບວຽກງານທັງໝົດນັ້ນແມ່ນກຳນົດໃຫ້ແລ້ວພາຍໃນ 5 ປີ ແຕ່ເພິ່ນບອກວ່າຈະກໍ່ສ້າງໃຫ້ແລ້ວກ່ອນກຳນົດທີ່ວາງໄວ້ ເພື່ອໃຫ້ທັນກັບປີທ່ອງທ່ຽວລາວ 2018 ນີ້.
ດ້ານນັກທ່ອງທ່ຽວທີ່ເຂົ້າມາທ່ຽວຊົມສັງເກດເຫັນວ່າມີນັກທ່ອງທ່ຽວເພີ່ມຂຶ້ນ 40% ຫຼື ບໍ່ຕ່ຳກວ່າ 800 ຄົນຕໍ່ມື້ ເຊິ່ງສ່ວນໃຫຍ່ແລ້ວແມ່ນນັກທ່ອງທ່ຽວທີ່ມາຈາກປະເທດເກົາຫຼີ, ຈີນ, ຫວຽດນາມ, ຝຣັ່ງ, ໄທ ແລະ ນັກທ່ອງທ່ຽວທົ່ວໄປ ລວມທັງພາຍໃນປະເທດ.
ສວນວັດທະນະທຳຊຽງຄວນ ແມ່ນເປີດໃຫ້ບໍລິການລະຫວ່າງ 8:00 ໂມງ - 17:30 ໂມງ ຂອງທຸກໆມື້ ຫ່າງຈາກຈຸດໃຈກາງນະຄອນຫຼວງ ໄປທາງຂົວມິດຕະພາບ ລາວ - ໄທ ປະມານ 20 ກວ່າກິໂລແມັດ ໄປໄດ້ສະດວກຕະຫຼອດລະດູ.
ແຫລ່ງທີ່ມາຈາກ ໜັງສືພິມ ເສດຖະກິດ ການຄ້າ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment