ສູນກາງແນວລາວສ້າງຊາດ ຮ່ວມກັບ ກຸ່ມບໍລິສັດ ພົງສະຫວັນ ໄດ້ຈັດພິທີວາງສີລາລຶກ ໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂຶ້ນທີ່ກຸ່ມບ້ານໂພນສະຫວາດ ເມືອງລ້ອງຊານ ແຂວງໄຊສົມບູນ ໃນວັນທີ 26 ມີນາ 2018 ໂດຍການເຂົ້າຮ່ວມຂອງທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ.
ທ່ານ ບຸນເອັ້ງ ກວ້າງມະນີວັນ ຮອງປະທານກຸ່ມບໍລິສັດພົງສະຫວັນ ຈຳກັດ ກ່າວວ່າ: ສູນກາງແນວລາວສ້າງຊາດ ແລະ ກຸ່ມບໍລິສັດພົງສະຫວັນຈຳກັດ ໄດ້ມີການລິເລີ່ມສ້າງໂຄງການ ນັບແຕ່ ເດືອນຕຸລາ 2017 ເປັນຕົ້ນມາ ແລະ ໄດ້ເຊັນບົດບັນທຶກຊ່ວຍຈຳໂຄງການດັ່ງກ່າວໃນວັນທີ 26 ທັນວາ 2017 ລະຫວ່າງສູນກາງແນວລາວສ້າງຊາດ ຮ່ວມກັບ ກຸ່ມບໍລິສັດພົງສະຫວັນ ແລະ ແນວລາວສ້າງຊາດແຂວງໄຊສົມບູນ.
ຜ່ານການຈັດຕັ້ງປະຕິບັດຕົວຈິງໄດ້ມີຜົນສຳເລັດຈຳນວນໜຶ່ງເປັນຕົ້ນແມ່ນ: ໄດ້ລົງເກັບກຳຂໍ້ມູນຕົວແບບຢູ່ບ້ານນາຈະເລີນ ເມືອງສັງທອງ ນະຄອນຫຼວງ ແລະ ເມືອງຮົ່ມ ແຂວງໄຊ, ເຂດຈຸດສຸມ ໂພນສະຫວາດ ເມືອງລ້ອງຊານ ແລະ ຕົກລົງເອົາໂພນສະຫວາດ ເມືອງລ້ອງຊານ ໄຊສົມບູນ ເປັນເຂດທົດລອງຂອງໂຄງການ, ເຊິ່ງເຂດຈຸດສຸມດັ່ງກ່າວແມ່ນມີທັງໝົດ 8 ບ້ານ, ມີ 1.338 ຄອບຄົວ ແລະ ມີພົນລະເມືອງ 8.098 ຄົນ, ມີ 165 ຄອບຄົວທຸກຍາກ ແລະ ມີຄອບຄົວຕ້ອງການທີ່ຈະລ້ຽງງົວມີ 339 ຄອບຄົວ, ລ້ຽງໝູ 32 ຄອບຄົວ, ລ້ຽງປາ 75 ຄອບຄົວ ແລະ ຕ້ອງການປູກໄມ້ກິນໝາກ 15 ຄອບຄົວ, ຕ່ຳຫູ 22 ຄອບຄົວ, ມີຄວາມຕ້ອງການທຶນໃນເບື້ອງຕົ້ນ 20 ຕື້ກີບ, ຜ່ານການຈັດຕັ້ງປະຕິບັດແມ່ນພວກເຮົາບັນລຸການສ້າງເຮືອນໃຫ້ປະຊາຊົນຜູ້ທຸກຍາກ ຈຳນວນ 5 ຫຼັງເກືອບສຳເລັດ 100% ແລະ ຊື້ງົວ 9 ໂຕ, ເບ້ຍໄມ້ກິນໝາກ 600 ເບ້ຍ ພ້ອມດ້ວຍວັດຖຸ ແລະ ເຄື່ອງໃຊ້ຄອບຄົວຈຳນວນໜຶ່ງ.
ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ກ່າວວ່າ: ເພື່ອເຮັດໃຫ້ໂຄງການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຢູ່ເມືອງລ້ອງຊານ ແຂວງໄຊສົມບູນ ໄດ້ຮັບການຈັດຕັ້ງປະຕິບັດ ແລະ ດຳເນີນໄປຢ່າງມີປະສິດທິຜົນ ແລະ ມີຄວາມຍືນຍົງ ຍາກໃຫ້ເນັ້ນບາງບັນຫາດັ່ງນີ້: ໃຫ້ຄະນະປະຈຳພັກແຂວງ, ອຳນາດການປົກຄອງເມືອງລ້ອງຊານ ເອົາໃຈໃສ່ໃຫ້ການສະໜັບສະໜູນບັນດາກິດຈະກຳຂອງໂຄງການ ພ້ອມເອົາໃຈໃສ່ວຽກງານໄກ່ເກ່ຍທີ່ດິນ ແລະ ຈັດສັນທີ່ດິນ ເພື່ອອຳນວຍຄວາມສະດວກໃຫ້ແກ່ໂຄງການ, ນອກນັ້ນຍັງສືບຕໍ່ປຸກລະດົມສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ເຊິ່ງແມ່ນໜຶ່ງໃນມາດຕະຖານຄອບຄົວພັດທະນາ ແລະ ບ້ານທະນາຂອງລັດຖະບານ ຕິດພັນກັບຂະບວນແຂ່ງຂັນຮັກຊາດ ແລະ ພັດທະນາຕາມທິດສາມສ້າງ;
ພ້ອມທັງສຶກສາອົບຮົມການເມືອງແນວຄິດ ແລະ ອະທິບາຍ ໃຫ້ປະຊາຊົນເຂົ້າໃຈເຖິງຄວາມສຳຄັນຂອງການ ເພື່ອໃຫ້ເຂົາເຈົ້າມີຄວາມຕື່ນຕົວ ແລະ ສະໝັກໃຈເຂົ້າຮ່ວມໂຄງການ; ພ້ອມທັງໃຫ້ກຸ່ມບໍລິສັດ ພົງສະຫວັນ ສືບຕໍ່ຈັດຕັ້ງບັນດາກິດຈະກຳທີ່ໄດ້ກຳນົດໄວ້ໃນແຜນການ, ພ້ອມເຝິກອົບຮົມໃຫ້ຄວາມຮູ້ດ້ານເຕັກການປູກ, ການລ້ຽງ, ການສ້າງໂຮງງານ ເພື່ອເກັບຮັກສາຄຸນນະພາບຂອງການຜະລິດ; ພັດທະນາໂຄງການໃຫ້ເປັນສູນຕົວແບບ, ກາຍເປັນແຫຼ່ງທ່ອງທ່ຽວ ແລະ ອື່ນໆ ທີ່ຈະນຳເອົາຜົນປະໂຫຍດມາສູ່ຊຸມຊົນ; ພ້ອມທັງຮຽກຮ້ອງໃຫ້ປະຊາຊົນທັງ 8 ບ້ານເອົາໃຈໃສ່ໃຫ້ການຮ່ວມມືເຂົ້າຮ່ວມພັດທະນາໂຄງການຮ່ວມກັນ ແລະ ສຳລັບຄອບຄົວທີ່ໄດ້ຮັບເຮືອນ, ງົວ ແລະ ຕົ້ນໄມ້ ແມ່ນໃຫ້ເອົາໃຈໃສ່ໃນການປົກປັກຮັກສານຳໃຊ້ໃຫ້ເກີດປະໂຫຍດ ແລະ ຍືນຍົງ.
ແຫຼ່ງທີ່ມາຈາກໜັງສືພິມເສດຖະກິດ ການຄ້າ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment