ເມືອງນານ ຄອງຊະນະເລີດ ການປະກວດຂັບພື້ນເມືອງຫຼວງພະບາງ

ເມື່ອບໍ່ດົນມານີ້ ທີ່ເດີ່ນ ພະແນກ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ( ຖວທ ແຂວງຫຼວງພະບາງ ) ໄດ້ຈັດງານປະກວດຂັບພື້ນເມືອງຫຼວງພະບາງ ໂດຍການເຂົ້າຮ່ວມຂອງທ່ານ ນາງ ອິນຖາວອນ ພົມມະຈັນ ຮອງເຈົ້າເມືອງຫຼວງພະບາງ,ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກ ຖວທ ແຂວງຫຼວງພະບາງ,ມີຄະນະບໍລິຫານງານຊາວໜຸ່ມແຂວງ,ລາວໂທລະຄົມ,ຕາງໜ້າພະແນກການອ້ອມຂ້າງ,ຄະນະກໍມະການ,ແຂກຖືກເຊີນ,ບັນດາ ຖວທ 12 ເມືອງ ພ້ອມດ້ວຍນັກຂັບພື້ນເມືອງ ແລະ ປະຊາຊົນຊາວຫຼວງພະບາງ-ຊາວຕ່າງປະເທດເຂົ້າຮ່ວມຢ່າງຫຼວງຫຼາຍ.

ທ່ານ ສົມອົກ ພັນທະວົງ ໄດ້ກ່າວວ່າ: ການຈັດງານຄັ້ງນີ້ ເປັນຄັ້ງທີ່ 2 ເພື່ອເປັນການອານຸລັກຮັກສາ ແລະ ເສີມຂະຫຍາຍຄຸ່ນຄ່າວັດທະນະທໍາອັນດີງາມທັງເປັນການປູກຈິດສໍານຶກທີິ່ດີໃຫ້ແກ່ອານຸຊົນຄົນຮຸ່ນຫຼັງໄດ້ຮຽນຮູ້ເຖິງຂະນົບທໍານຽມ, ຮີດຄອງປະເພນີ, ສິລະປະວັນນະຄະດີ ແລະ ແບບແຜນການດໍາລົງຊີວິດອັນດີງາມຂອງປະຊາຊົນລາວບັນດາເຜົ່າໃຫ້ໝັ້ນຄົງຕະຫຼອດໄປ.ຈື່ງໄດ້ຈັດງານປະກວດຂັບພື້ນເມືອງຫຼວງພະບາງນີ້ຂື້ນ,ເຊີ່ງແມ່ນໜື່ງໃນກິດຈະກໍາຫຼັກໃນການສົ່ງເສີມປີທ່ອງທ່ຽວລາວ 2018 ຂອງແຂວງຫຼວງພະບາງ ແລະ ເປັນການສ້າງຂະບວນການຂໍ່ານັບຮັບຕ້ອນພິທີສະເຫຼີມສະຫຼອງປີທ່ອງທ່ຽວລາວ 2018 ແລະ ພິທີປະກາດການສ້າງຕັ້ງເມືອງຫຼວງພະບາງເປັນນະຄອນ ເຊີ່ງຈະໄດ້ຈັດຂື້ນໃນມໍ່ໆນີ້.

ໃນນີ້ໄດ້ຄັດເອົາລູກຫຼານນ້ອງນັກຮຽນຊັ້ນມັດທະຍົມຕົ້ນ ແລະ ມັດທະຍົມປາຍທີ່ເປັນຕົວແທນມາຈາກ 12 ເມືອງໃນທົ່ວແຂວງຫຼວງພະບາງ ແລະ ແຕ່ລະເມືອງປະກອບມີ 4 ນ້ອງຄື: ຍິງ 2 ນ້ອງ ແລະ ຊາຍ 2 ນ້ອງພ້ອມທັງພະນັກງານນໍາພາຈາກຫ້ອງການ ຖວທ ເມືອງລະ 1 ທ່ານ ແລະ ຄູອາຈານສິດສອນ 1 ທ່ານ ລວມທັງໝົດ 72 ຄົນ.

ກິດຈະກໍາທີ່ຈັດງນຄັ້ງນີ້ປະກອບມີ: ອ່ານໜັງສື, ຂັບທຸ້ມ, ຂັບເຜົ່າມົ້ງ,ເຕີມຂອງຊົນເຜົ່າກຶມມຸ, ການສະແດງສິລະປະວັນນະຄະດີຈາກກອງສິລະປະກອນແຂວງ, ການວາງສະແດງ ແລະ ຈໍາໜ່າຍອາຫານພື້ນເມືອງ, ຜະລິດຕະພັນປອດສານພິດ ແລະ ອື່ນໆ.ທ່ານ ໃຫ້ຮູ້ອີກວ່າ: ການນໍາໃຊ້ງົບປະມານເຂົ້າໃນການຈັດງານຄັ້ງນີ້ ແມ່ນງົບປະມານຂອງລັດ ຈໍານວນ 48.095.000 ກີບ ແລະ ມີບັນດາໂຮງແຮມ, ຮ້ານອາຫານຈໍານວນໜື່ງໄດ້ໃຫ້ການອຸປະຖໍາທາງດ້ານທີ່ພັກ ແລະ ອາຫານໃຫ້ແກ່ບັນດາເມືອງທີ່ເຂົ້າຮ່ວມຕະຫຼອດໄລຍະການຈັດງານ. ພ້ອມນີ້ຍັງໄດ້ຮັບການອຸປະຖໍາ ແລະ ປະກອບສ່ວນ ດ້ານອຸປະກອນ,ໂຕະຕັ່ງ ແລະ ອາຫານຈໍານວນໜຶ່ງຈາກບໍລິສັດ, ຫ້າງຮ້ານ, ນັກທຸລະກິດທັງພາຍໃນ ແລະ ຕ່າງປະເທດ ເປັນວັດຖຸ ແລະ ເງິນສົດຕື່ມອີກ.ຈາກນັ້ນ ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກ ຖວທ ແຂວງ ກໍ່ໄດ້ຂື້ນລັ່ນຄ້ອງ 9 ບາດເພື່ອເປັນສັນຍາລັກແຫ່ງການເປີດ
ງານປະກວດຢ່າງເປັນທາງການ.

ທ່າມກາງການແຂ່ງຂັນຂັບພື້ນເມືອງຫຼວງພະບາງໃນຄັ້ງນີ້ ໂດຍເລີ່ມຈາກການສະແດງຂອງກອງສິລະປະກອນພະແນກ ຖວທ ແຂວງ ມາໃນການຂັບທຸ້ມອ່ານໜັງສື ແລະ ບົດຟ້ອນ ແລະ ຕໍ່ດ້ວຍບັນດາເມືອງ ຂື້ນແຂ່ງຂັນຂັບພື້ນເມືອງຕາມລໍາດັບ.

ຜ່ານການຊົມ,ການເຊຍກັນຢ່າງມ່ວນຊື່ນຂອງກອງເຊຍບັນດາເມືອງ ແລະ ປະຊາຊົນເຂົ້າຮ່ວມ,ຜົນປະກົດວ່າ:
ທີ່ 1 ເມືອງນານສາມາດຂັບໄດ້ຈັບໃຈ ຄະນະກໍາມະການ ແລະ ຜູ້ຊົມຜູ້ເຊຍ ໂດຍໄດ້ 307 ຄະແນນ ໄດ້ຮັບເງິນສົດ 1.800.000ກີບ ພ້ອມດ້ວຍລະນາດ 1 ຊຸດ,
ທີ່ 2 ເມືອງງອຍ ໄດ້ 268 ຄະແນນ ຮັບເງິນສົດ 1.500.000ກີບພ້ອມດ້ວຍລະນາດ 1 ຊຸດ,
ທີ່ 3 ເມືອງຫຼວງພະບາງ ໄດ້ 263 ຄະແນນ ຮັບເງິນສົດ 1.200.000ກີບ ພ້ອມດ້ວຍລະນາດ 1 ຊຸດ ແລະ

ລາງວັນຊົມເຊີຍມີ 8 ເມືອງຄື: ເມືອງນໍ້າໄດ້ 212 ຄະແນນ,ປາກອູ ໄດ້ 161 ຄະແນນ,ພູຄູນ ໄດ້ 155 ຄະແນນ,ຊຽງເງິນ ໄດ້ 151 ຄະແນນ,ຈອມເພັດ ໄດ້ 195 ຄະແນນ,ປາກແຊງ ໄດ້ 212 ຄະແນນ,ໂພນໄຊ ໄດ້ 208 ຄະແນນ ແລະ ເມືອງໂພນທອງ ໄດ້ 216 ຄະແນນ ໄດ້ຮັບເງິນສົດເມືອງລະ 1.000.000ກີບ.

ນອກຈາກນີ້ຍັງມີລາງວັນພິເສດໃນການຂັບ ສະຫຼາງ,ມ້າຢ່ອງ 2 ເມືອງຄື: ເມືອງນານ ແລະ ເມືອງຊຽງເງິນ ໃນນັ້ນມີ 4 ນ້ອງ ໄດ້ຮັບລາງວັນເງິນສົດ 100.000ກີບຕໍ່ຄົນ.ໂດຍການພັດປ່ຽນກັນຂື້ນມອບມີທ່ານ ສຸລິທິບ ໜໍ່ຄຸນຜົນ,ທ່ານ ນາງ ອິນຖາວອນ ພົມມະຈັນ ແລະ ທ່ານ ໜໍ່ເງິນ ວິລະວົງສາ ອໍານວຍການ ລັດວິສາຫະກິດລາວໂທລະຄົມສາຂາແຂວງຫຼວງພະບາງ.