ປີຜ່ານມາ ກວດກາພົບ ລົດບັນທຸກໜັກເກີນ 2.000 ກວ່າຄັນ

ບັນຫາລົດບັນທຸກທີ່ບັນທຸກສິນຄ້າໜັກເກີນກຳນົດ ແລ່ນເຂົ້າຕົວເມືອງ ເປັນສາເຫດໜຶ່ງທີ່ພາໃຫ້ ການສັນຈອນຕິດຂັດ ແລະ ເຮັດໃຫ້ຖະໜົນເປ່ເພກ່ອນອາຍຸການໃຊ້ງານ, ສົ່ງຜົນກະທົບຫຼາຍດ້ານ ໂດຍສະເພາະການສູນເສຍງົບປະມານໃນການບູລະນະ ສ້ອມແປງເສັ້ນທາງໃນແຕ່ລະປີເປັນຈຳນວນບໍ່ໜ້ອຍ, ໃນໜຶ່ງປີຜ່ານມາ ໜ່ວຍງານຄຸມຄອງລົດບັນທຸກໜັກໃນນະຄອນຫຼວງວຽງຈັນ ໄດ້ກວດພົບລົດບັນທຸກໜັກເກີນກຳນົດຈຳນວນ 2.113 ຄັນ.

ທ່ານ ສົມຄິດ ບຸນເຮືອງ ຫົວໜ້າໜ່ວຍງານຄຸ້ມຄອງລົດບັນທຸກໜັກ ພະແນກໂຍທາທິການ ແລະ ຂົນສົ່ງ ນະຄອນ ຫຼວງວຽງຈັນ ໄດ້ໃຫ້ສຳພາດວ່າ ຢູ່ນະຄອນຫຼວງວຽງຈັນ ມີດ່ານກວດກາຕິດຊັ່ງນ້ຳໜັກ ລົດບັນທຸກຈຳນວນ 4 ຈຸດຄື: ດ່ານແຈ້ງສະຫວ່າງ, ດ່ານໂພສີ, ດ່ານຫຼັກ 21 ແລະ ດ່ານໜອງດາ+ຈຸດກວດກາເຄື່ອນທີ່ສະເພາະກິດ ທີ່ເຮັດໜ້າທີ່ກວດກາ ແລະ ຕິດຊັ່ງໃນການຄຸ້ມຄອງລົດບັນທຸກ ເພື່ອບໍ່ໃຫ້ບັນທຸກນ້ຳໜັກເກີນຈາກການອະນຸຍາດ ເພື່ອປົກປັກຮັກສາເສັ້ນທາງຫຼວງ ແລະ ຂົວ ໃຫ້ມີອາຍຸການນຳໃຊ້ຍາວນານ ແລະ ເປັນການປະຢັດງົບປະມານລາຍຈ່າຍຂອງລັດໃນການກໍ່ສ້າງ ແລະ ສ້ອມແປງທາງ ເຊິ່ງການກວດກາ ແລະ ຕິດຊັ່ງ ມີ 3 ປະເພດຄື: ຕິດຊັ່ງຕົວຈິງ ແລະ ການແຈ້ງຜ່ານ.

ຜ່ານການກວດກາໃນໄລຍະ 1 ປີທີ່ຜ່ານມາ ກວດພົບລົດບັນທຸກໜັກເກີນຈຳນວນ 2.113 ຄັນ, ໃນນີ້ມີລົດບັນທຸກປະເພດ 6 ລໍ້ ຈຳນວນ 41 ຄັນ, ລົດບັນທຸກ 8 ລໍ້ ມີ 23 ຄັນ, ລົດບັນທຸກ 10 ລໍ້ ມີ 745 ຄັນ, ລົດບັນທຸກ 12 ລໍ້ ມີ 1.032 ຄັນ, ລົດບັນທຸກ 16 ລໍ້ ມີ 4 ຄັນ, ລົດບັນທຸກ 18 ລໍ້ ມີ 18 ຄັນ, ລົດບັນທຸກ 20 ລໍ້ ມີ 6 ຄັນ, ລົດບັນທຸກ 22 ລໍ້ມີ 222 ຄັນ, ລົດບັນທຸກ 24 ລໍ້ມີ 13 ຄັນ, ລົດບັນທຸກ 28 ລໍ້ມີ 2 ຄັນ.

ໃນການແກ້ໄຂບັນຫາດັ່ງກ່າວ, ໜ່ວຍງານຄຸ້ມຄອງລົດບັນທຸກໜັກ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ກໍໄດ້ເອົາໃຈໃສ່ກວດກາໃນກໍລະນີທີ່ພົບເຫັນຜູ້ຂັບຂີ່ລົດບັນທຸກແກ່ເຄື່ອງ, ສິນຄ້າ ແລະ ແກ່ຫີນ-ຊາຍ ໜັກເກີນກຳນົດ ຈະຖືກປະຕິບັດຕາມດຳລັດວ່າດ້ວຍການປັບໃໝ ແລະ ມາດຕະການຕ່າງໆຕໍ່ຜູ້ລະເມີດລະບຽບ, ກົດໝາຍດຽວກັບການສັນຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເລກທີ 188/ນຍ ເຊິ່ງດຳລັດສະບັບດັ່ງກ່າວລະບຸໄວ້ຢ່າງຈະແຈ້ງວ່າ ຢູ່ໃນມາດຕາ 33 ວ່າດ້ວຍການບັນທຸກສິນຄ້າ ຫຼື ເຄື່ອງຂອງເກີນຂະໜາດຄື: ຜູ້ຂັບຂີ່ ຫຼືເຈົ້າຂອງລົດຫາກໄດ້ບັນທຸກເຄື່ອງ, ສິນຄ້າ, ແກ່ຫີນ ແລະ ຊາຍເກີນຂະໜາດແລ້ວເຮັດໃຫ້ກີດຂວາງຈະລາຈອນເຊັ່ນ: ຍາວໂພດ, ກ້ວາງໂພດ ຫຼືສູງໂພດ ຈະຖືກປັບໃໝ 80.000 ກີບ ຕໍ່ຖ້ຽວຕໍ່ຄັນ, ພ້ອມທັງຮັບຜິດຊອບຕາມແຈ້ງການສະບັບເລກທີ 2157/ຄຂປກ ກະຊວງຄົມມະນາຄົມ ແລະ ຂົນສົ່ງ ໄປສະນີ ແລະ ກໍ່ສ້າງ.

ໃນເມື່ອກ່ອນໃນການວາງມາດຕະການ ຕໍ່ຜູ້ລະເມີດຂໍ້ກຳນົດວ່າດ້ວຍ ດ່ານອະນຸມັດນ້ຳໜັກລວມສູງສຸດຂອງລົດຂົນສົ່ງ ແລ່ນຕາມທາງບົກໃນສປປ ລາວ ແມ່ນຈະຖືກປັບໃໝຄ່າເສຍຫາຍເສັ້ນທາງ 6.700 ກີບຕໍ່ກິໂລແມັດ, ຄ່າບໍລິການຊັ່ງນ້ຳໜັກເກີນ 300 ກີບຕໍ່ກິໂລແມັດ, ຄ່າຄຸ້ມຄອງທາງ 1 ກິໂລແມັດຕໍ່ 7.000 ກີບ ແລະ ຄ່າປັບໃໝນ້ຳໜັກເກີນ 50.000 ກີບ ຕໍ່ຖ້ຽວຕໍ່ຄັນ.

ເພື່ອເປັນການຄຸ້ມຄອງລົດບັນທຸກໃຫ້ເຂົ້າຕາມລະບຽບຫຼັກການ, ບັນທຸກນ້ຳໜັກຂອງລົດຂົນສົ່ງ ໂດຍສະເພາະຜູ້ປະກອບທຸລະກິດແກ່ເຄື່ອງ, ສິນຄ້າ ແລະ ແກ່ຫີນ-ຊາຍ ຕາມຈຸດຕ່າງໆ ແລະ ເສັ້ນທາງພາກສ່ວນກ່ຽວຂ້ອງຕ້ອງ ເຄື່ອນໄຫວຢ່າງຕັ້ງໜ້າໃນການສະກັດກັ້ນ ແລະ ແກ້ໄຂຢ່າງຈິງຈັງ ໃນການຕິດຊັ່ງໃນການຄຸ້ມຄອງລົດບັນທຸກໜັກບໍ່ໃຫ້ມີນ້ຳໜັກເກີນການອະນຸຍາດ ເພື່ອເປັນການປົກປັກຮັກສາເສັ້ນທາງຫຼວງ ແລະ ຂົວ ໃຫ້ມີອາຍຸການນຳໃຊ້ທີ່ຍາວນານ ທັງເປັນການປະຢັດງົບປະມານລາຍຈ່າຍຂອງລັດໃນການກໍ່ສ້າງ ແລະ ສ້ອມແປງຂົວທາງ.