ຂ່າວໃໝ່ໄຊຊະນະ ແກ້ວພິມພາ ຈຳເລີຍຢາເສບຕິດລາຍໃຫຍ່

ໃນວັນທີ 20 ມີນາ 2018 ທີ່ສານອາຍາ ຣັຊດາທິເບກ ເຈົ້າໜ້າທີ່ຣາຊທັນ ໄດ້ເບີກຕົວ ທ້າວ ໄຊຊະນະ ແກ້ວພິມພາ ຈຳເລີຍຄະດີ ຢາເສບຕິດ ຈາກສະຖານທີ່ບຳບັດພິເສດກາງ ຄຸກພິເສດ ກຸງເທບ ໄທ ເດີນທາງມາຮັບຟັງຄຳພິພາກສາ ໃນຄະດີທີ່ພະນັກງານໄອຍະການຄະດີຍາເສບຕິດ 10 ເປັນໂຈດຍື່ນຟ້ອງ ໃນຄວາມຜິດສົມຄົບກັນນຳຢາເສບຕິດຈຳນວນ 1,2 ລ້ານເມັດ ເຂົ້າໃນປະເທດໄທ ແລະ ຖືກຈັບໄດ້ທີ່ສະໜາມບິນສຸວັນນະພູມ ໃນວັນທີ 19 ມັງກອນ 2017. ຊຶ່ງສານໄດ້ມີການພິຈາລະນາຫຼຸດໂທດໃຫ້ ເນື່ອງຈາກຜູ້ກ່ຽວໃຫ້ການທີ່ເປັນປະໂຫຍດແກ່ຮູບຄະດີ.

ຕາມຂ່າວຈາກໜັງສືພິມປະຊາຊາດ ລາຍງານວ່າເຊົ້າມື້ນີ້ເວລາ 9:30 ນາທີ ສານໄດ້ອ່ານຄຳພິພາກສາຄະດີຂອງ ທ້າວໄຊຊະນະ ແກ້ວພິມພາ ອາຍຸ 42 ປີນັກຄ້າຢາເສບຕິດລາຍໃຫຍ່ສັນຊາດລາວ ຈຳເລີຍມີຄວາມຜິດຖານສົມຄົບກັນຕັ້ງແຕ່ 2 ຄົນຂຶ້ນໄປເພື່ອກະທຳຜິດກ່ຽວກັບຢາເສບຕິດ ແລະໄດ້ມີການກະທຳກ່ຽວກັບຢາເສບຕິດ, ຮ່ວມກັນນຳເຂົ້າຢາບ້າຊຶ່ງເປັນຢາເສບຕິດໃຫ້ໂທດປະເພດໜຶ່ງ ເພື່ອຈຳໜ່າຍໂດຍບໍ່ໄດ້ຮັບອະນຸຍາດ.

ນັບແຕ່ທ້າວໄຊຊະນະ ແກ້ວພິມພາຖືກຈັບທາງເຈົ້າໜ້າທີ່ໄທໄດ້ປະຕິບັດການສືບສວນສອບສວນຕາມຂະບວນການຂອງກົດໝາຍໃນທຸກຂັ້ນຕອນ ນັບທັງພະຍານຫຼັກຖານ, ໂທລະສັບທີ່ໃຊ້ໃນການຕິດຕໍ່ສື່ສານອື່ນໆ ຊຶ່ງສານໄດ້ພິພາກສາວ່າຜູ້ກ່ຽວກັບມີຄວາມຜິດຖານສົມທົບກັນກະທຳຜິດກ່ຽວກັບຢາເສບຕິດ, ຈຳໜ່າຍຢາເສບຕິດ ແລະນຳເຂົ້າຢາເສບຕິດມາຍັງລາຊະນານາຈັກ ເປັນການກະທຳກຳດຽວຜິດກົດໝາຍຫຼາຍບົດ ໃຫ້ລົງໂທດສູງສຸດຄືປະຫານຊີວິດ ແຕ່ເນື່ອງຈາກຈຳເລີຍໃຫ້ການຮັບສາລະພາບໃນຊັ້ນສອບສວນທີ່ເປັນປະໂຫຍດແກ່ການພິຈາລະນາຄະດີ ຈິ່ງພິຈາລະນາຫຼຸດໂທດໃຫ້ 1 ໃນ3 ໂດຍໃຫ້ປ່ຽນຈາກໂທດປະຫານເປັນການຈຳຄຸກຕະຫຼອດຊີວິດແທນ.