ຜູ້ນຳຈີນ-ລັດເຊຍ ເປັນເອກະພາບ ຈະປະສານງານກັນຢ່າງແໜ້ນແຟ້ນ ເພື່ອຮັບມືກັບສະຖານະການຢູ່ແຫລມເກົາຫຼີ
(ຊີອາໄອ) ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານວະລາດີເມຍ ປູຕິນ ປະທານາທິບໍດີຣັດເຊຍຢູ່ເມືອງເຊ້ຍເໝິນ ສປ ຈີນໃນວັນທີ 3 ກັນຍານີ້.
ການພົບປະດັ່ງກ່າວ, ປະມຸກລັດສອງປະເທດໄດ້ເປັນເອກະພາບກັນວ່າຈະສືບຕໍ່ຮັກສາການໄປມາຫາສູ່ຢ້ຽມຢາມລະຫວ່າງການນຳຂັ້ນສູງ, ເພີ່ມທະວີສາຍພົວພັນຄູ່ຮ່ວມປະສານງານທາງຍຸດທະສາດຮອບດ້ານ ແລະ ລົງເລິກການແລກປ່ຽນ, ປະສານງານໃນບັນຫາສາກົນແລະພາກພື້ນທີ່ສຳຄັນ.
ນອກນີ້, ສອງຝ່າຍຍັງເຫັນດີລົງເລິກການຮ່ວມມືໃນຂົງເຂດຕ່າງໆ ເປັນຕົ້ນ ການລົງທຶນ, ພະລັງງານ, ກະສິກຳ, ພື້ນຖານໂຄງລ່າງ, ການບິນ ແລະ ການບິນອະວະກາດ, ເພີ່ມທະວີການແລກປ່ຽນດ້ານວັດທະນະທຳ, ການສຶກສາ, ກິລາ, ສື່ມວນຊົນ, ການທ່ອງທ່ຽວ, ການຮ່ວມມືຂັ້ນທ້ອງຖິ່ນ ແລະຮັດແໜ້ນສາຍພົວພັນລະຫວ່າງສອງກອງທັບ.
ນອກນີ້, ຜູ້ນຳທັງສອງຍັງໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນ ທັງເປັນເອກະພາບຍຶດໝັ້ນເປົ້າໝາຍການປອດນິວເຄລຍຢູ່ແຫຼມເກົາຫຼີ, ແລກປ່ຽນປະສານງານຢ່າງແໜ້ນແຟ້ນ ເພື່ອຮັບມືກັບສະຖານະການຫຼ້າສຸດທີ່ຜັນແປຈາກການທົດລອງນິວເຄລຍອີກຄັ້ງໃໝ່ຂອງ ສປປ ເກົາຫຼີ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment