ມື້ນີ້ລາວອັບເດດເຮົາເອົາຜົນງານສ່ວນນ້ອຍໜຶ່ງຂອງອ້າຍນ້ອງອາສາກູ້ໄພຈາກສະຫວັນນະເຂດ ມານຳສະເໜີ ເພິ່ນພາກັນໄປຊ່ວຍປະຊາຊົນກ່ຽວເຂົ້າ ແລະຂຽນສຳນວນສັ້ນໆວ່າ "ອາສາກູ້ໄພເຮັດໄດ້ທຸກຢ່າງ" ແຕ່ບໍ່ແມ່ນຈະໃຫ້ເອີ້ນກູ້ໄພໄປກ່ຽວເຂົ້າຊ່ວຍເດີ!!ພຽງແຕ່ຢາກບອກວ່າອັນທີ່ຈິງແລ້ວທຸກຄົນແມ່ນມີຄວາມສາມາດສະເພາະຕົວທີ່ແຕກຕ່າງກັນໄປ ຕ່າງແຕ່ວ່າແຕ່ລະຄົນຈະຍອມເອົາອອກມານຳໃຊ້ຫຼືບໍ ແລະຈະໃຊ້ເມື່ອໃດກໍ່ເທົ່ານັັ້ນ?
ແອັດມິນຍັງບໍ່ມີໂອກາດໄດ້ລົມກັບອ້າຍນ້ອງກູ້ໄພເລີຍຈັກຄັ້ງໜຶ່ງ ແຕ່ກໍ່ໄດ້ຍິນສຽງຈາກຄົນຂ້າງກາຍຂອງຜູ້ທີ່ເປັນກູ້ໄພ ເພິ່ນບອກວ່າເປັນກູ້ໄພບໍ່ໄດ້ເງິນເດືອນ ແຕ່ໄວໜຸ່ມພາກັນຮີດໄປເຮັດວຽກໃນຈຸດນີ້ ເພາະໄດ້ຊ່ວຍເຫຼືອສັງຄົມ ເປັນວຽກທີ່ມີກຽດ ແລະໄດ້ບູນກຸສົນຫຼາຍ. ຂະນະທີ່ແມ່ຄົນໜຶ່ງເລົ່າວ່າລູກຊາຍຢາກໄປເປັນກູ້ໄພ ແຕ່ກ່ອນຈະໄດ້ເປັນຕ້ອງເຂົ້າຝຶກອົບຮົມໄລຍະໃດໜຶ່ງຈົນກວ່າຈະຜ່ານກ່ອນຈິ່ງໄດ້ອອກຮັບໃຊ້ສັງຄົມດັ່ງທີ່ພວກເຮົາເຫັນຢູ່ທົ່ວໄປ ຖ້າຜ່ານຈຸດນີ້ແລ້ວແມ່ກໍ່ຮູ້ສຶກໂລ່ງໃຈ ສ່ຳກັບລູກໄດ້ຮຽນຈົບພະຍາບານຂັ້ນຕົ້ນແລ້ວ!!
ເຊື່ອເຫຼືອເກີນວ່າການເປັນອາສາກູ້ໄພກໍ່ເທົ່າກັບໄດ້ເຂົ້າມະຫາວິທະຍາໄລພາກປະຕິບັດຕົວຈິງແລ້ວ ເພາະທີ່ນີ້ເປັນບ່ອນຝຶກຝົນຫຼໍ່ຫຼອມໄວໜຸ່ມຊາວໜຸ່ມດ້ວຍການຮູ້ ແລະເຫັນຕົວຈິງນາທີຊີວິດຂອງມະນຸດໃນຫຼາກຫຼາຍຮູບແບບ ໜ້າທີ່ໃນຈຸດນີ້ໜ້ອຍບໍ່ຫຼາຍກໍ່ສາມາດສ້າງຄົນຜູ້ທີ່ແຂງກະດ້າງໃຫ້ເປັນຄົນອ່ອນໂຍນຮູ້ຮັກໂຕເອງຮັກຄອບຄົວຫຼາຍຂຶ້ນໂດຍຜ່ານເລື່ອງລາວຕ່າງໆທີ່ພົບເຫັນ. ແລະອາດມີຊາວໜຸ່ມເຍົາວະຊົນຫຼາຍຄົນທີ່ເກີດມາພໍ່ແມ່ບໍ່ເຄີຍໃຫ້ເຮັດຫຍັງ ຫຼື ເຮັດຫຍັງບໍ່ເປັນແຕ່ການມາເປັນອາສາເພິ່ນກໍ່ຕ້ອງໄດ້ຮູ້ເພາະນັ້ນຄືໜ້າວຽກທີ່ຕ້ອງເຮັດ.
ຕ້ອງສະແດງຄວາມຊົມເຊີຍກູ້ໄພທຸກໜ່ວຍທີ່ຈັດຕັ້ງມູນນິທິຕ່າງໆຂຶ້ນມາຊ່ວຍເຫຼືອສັງຄົມໂດຍບໍ່ຫວັງສິ່ງຕອບແທນ ແລະພວກທ່ານກໍ່ໄດ້ຊ່ວຍເຫຼືອຊ່ວຍຊີວິດເພື່ອນມະນຸດດ້ວຍກັນ, ລວມທັງສັດລ້ຽງ, ສັດປ່າມາຢ່າງຫຼວງຫຼາຍ ສັງຄົມກໍ່ຮູ້ເຫັນ ແລະລ້ວນຊື່ນຊົມຍ້ອງຍໍ ຂໍໃຫ້ອາສາກູ້ໄພທຸກທ່ານຈົ່ງສືບຕໍ່ເຮັດໜ້າທີ່ນີ້ຕໍ່ໄປ ເພື່ອຊາດ ແລະສັງຄົມ.
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment