ຈາກກໍລະນີພະນັກງານໄຟຟ້າລາວປະຕິບັດຫນ້າທີ່ແລ້ວຖືກໄຟຟ້າຊ໊ອດຈົນເສຍຊິີວິດນັ້ນ ໄດ້ຮັບຄວາມສົນໃຈຫຼາຍຈາກສັງຄົມ ໂດຍສ່ວນໃຫຍ່ສະແດງຄວາມເສົ້າໂສກນໍາຄວບຄົວຜູ້ສູນເສຍ; ພ້ອມຕັ້ງຄຳຖາມເຖິງມາດກະການຄວາມປອດໄພໃນເວລາປະຕິບັດວຽກທີ່ບໍລິສັດໄຟຟ້າລາວຄວນຕ້ອງເບິ່ງຢ່າງຈິງຈັງ ແລະ ເຂົ້າສູ່ມາດຕະຖານ.
ຫລ້າສຸດຫນັງສືພິມລາວພັດທະນາສະບັບວັນຈັນທີ8 ມັງກອນ ໄດ້ນຳສະເຫນີສາເຫດຂອງເຫດການຄັ້ງນີ້ວ່າ:
ເກີດຄວາມຜິດພາດເຖິງແກ່ຊີວິດຈາກການປະຕິບັດງານຂອງພະນັກງານໄຟຟ້າລາວ ເມື່ອວັນທີ 2 ມັງກອນ 2018 ທີ່ບ້ານທົ່ງມັ່ງເມືອງໄຊທານີນະຄອນຫລວງວຽງຈັນ, ຍ້ອນໄຟຟ້າແຮງສູງ 22 ກິໂລໂວນຊ໊ອດແລ້ວຕົກລົງມາຈາກເສົາໄຟສູງ 12 ແມັດ ແລະ ເສຍຊີວິດໃນເວລາຕໍ່ມາ, ອັນໄດ້ສ້າງຄວາມສະເທືອນຂວັນໃນວົງການໄຟຟ້າລາວ ແລະ ສັງຄົມ. ສາເຫດເກີດຈາກຄວາມບົກຜ່ອງ, ຂາດການປະສານງານກັນລະຫວ່າງພາກສ່ວນຄຸ້ມຄອງຕາຂ່າຍ ແລະ ສະຖານີຈ່າຍໄຟຟ້າເອງ, ຈິ່ງເຮັດໃຫ້ເກີດການສູນເສຍດັ່ງກ່າວ.
ພະນັກງານໄຟຟ້າເຂດ II ທ່ານໜຶ່ງເລົ່າວ່າ: ໄຟຟ້າທີ່ບ່ອນຜູ້ກ່ຽວໄດ້ໄປປະຕິບັດວຽກງານຢູ່ນັ້ນແມ່ນຂຶ້ນກັບສະຖານີບ້ານວຽງແກ້ວ ແລະ ກ່ອນຈະໄປເຮັດວຽກຢູ່ທີ່ນັ້ນແມ່ນໄດ້ປະສານຫາກັນແລ້ວ ແລະ ມີການຕັດໄຟໄວ້ແລ້ວຈຳນວນໜຶ່ງ ແລະ ສາຍໜຶ່ງແມ່ນຍັງສືບຕໍ່ປ່ອຍໄຟຟ້າໄປໃຫ້ປະຊາຊົນບໍລິເວນໃກ້ຄຽງຊົມໃຊ້, ຈົນຕື່ນເຊົ້າມາສະຖານີຈ່າຍໄຟວຽງແກ້ວບໍ່ໄດ້ຕັດໄຟ.ຈາກນັ້ນໜ່ວຍງານຄຸ້ມຄອງຕາຂ່າຍລົງໄປເຮັດວຽກ, ໂດຍທ້າວ ມິນທະດາ ພົມມະໄກສອນ ປີນເສົາໄຟ 22 ກິໂລໂວນສູງ 12 ແມັດເພື່ອປິດຂົ້ວສາຍແຈກ, ເມື່ອຂື້ນໄປຮອດຈຸດ ແລະ ພວມຈະເອົາສາຍແອວເກາະໃສ່ເສົາຈຶ່ງຖືກໄຟຊັອດຕົກລົງມາພາດໃສ່ໄຟ 220 KV ຕື່ມອີກແລ້ວຈຶ່ງຕົກລົງສູ່ພື້ນດິນ.
ການຊ່ວຍເຫລືອໃນເວລານັ້ນ, ພຽງແຕ່ໄດ້ຮັບການປະຖົມພະຍາບານເບື້ອງຕົ້ນເອົານ້ຳເຫຼົ້າຫົດ ແລະ ຕ້ອງເສຍເວລາລໍ້ຖ້າລົດກູ້ໄພຫຼາຍສິບນາທີຈຶ່ງມາຮອດ. ແຕ່ລົດກູ້ໄພນັ້ນພັດບໍ່ມີອົກຊີຊ່ວຍໃນການຫາຍໃຈ, ຈົນມາຮອດໂຮງໝໍເມືອງໄຊທານີຜູ້ກ່ຽວຍັງມີລົມຫາຍໃຈຢູ່ແລ້ວຖືກສົ່ງມາໂຮງໝໍມິດຕະພາບ, ໝໍຈິ່ງພົບວ່າຜູ້ກຽວໄດ້ເສຍຊີວິດຍ້ອນທົນກັບຄວາມເຈັບປວດບໍ່ໄດ້.
ນີ້ເປັນອຸທາຫອນໄວ້ສຳລັບທຸກຄົນໃນການປະຕິບັດໜ້າທີ່ວຽກງານ, ການດຳລົງຊີວິດ, ຖ້າຫາກເຮົາຂາດສະຕິ, ເຮັດວຽກຮ່ວມກັນຫລາຍຄົນ, ຫຼາຍພາກສ່ວນຫາກຂາດການປະສານງານ, ຂາດຄວາມພ້ອມ, ແນ່ນອນຄວາມຜິດພາດ ແລະ ຄວາມສູນເສຍກໍ່ຈະຕາມມາ.
ທີ່ມາຈາກຫນັງສືພິມລາວພັດທະນາ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment