ບຸນກອງເຂົ້າໃຫຍ່ ເມືອງພຽງ ອີກຫນຶ່ງລາຍການສົ່ງເສີມການທ່ອງທ່ຽວທີ່ຫນ້າສົນໃຈ (ມີວີດີໂອ)

ໃນວັນທີ 09 ມັງກອນ 2018 ທີ່ເມືອງພຽງ ແຂວງໄຊຍະບູລີ, ໄດ້ຈັດພິທີເປີດປີທ່ອງທ່ຽວລາວ 2018 ແລະ ງານເທດສະການບຸນກອງເຂົ້າໃຫຍ່ ຂອງແຂວງດັ່ງກ່າວຂຶ້ນ, ໂດຍການ ໃຫ້ກຽດລັ່ນຄ້ອງ 9 ບາດ ເປີດງານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທັງເປັນປະທານຊີ້ນໍາຈັດງານປີທ່ອງທ່ຽວລາວ 2018 ລະດັບຊາດ, ເຊິ່ງມີ ທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ, ມີບັນດາຄະນະພັກ-ຄະນະນຳແຂວງ, ບັນດາຜູ້ຕາງໜ້າຈາກ ແຂວງອ້ອມຂ້າງ, ກະຊວງ-ກົມກອງທີ່ກ່ຽວຂ້ອງ, ແຂກພາຍໃນ ແລະ ຕ່າງປະເທດ, ພ້ອມດ້ວຍພໍ່ແມ່ປະຊາຊົນຊາວເມືອງພຽງ ແລະ ບັນດາເມືອງອ້ອມຂ້າງແຂວງໄຊຍະບູລີ ເຂົ້າຮ່ວມຢ່າງເປັນຂະບວນຟົດຟື້ນ.

ສຳລັບການຈັດງານໃນປີນີ້, ແມ່ນຈັດຂຶ້ນ ໃນລະຫວ່າງວັນທີ 8-12 ມັງກອນ 2018 ປະກອບດ້ວຍມີຫລາຍກິດຈະກຳ ເຊັ່ນ: ການປະກາດຮັບຮອງກົມກອງວັດທະນະທຳ, ຂະບວນແຮ່ເຂົ້າເປືອກເຂົ້າສານ ພ້ອມດ້ວຍກ້ອນກຳລັງມວນຊົນ-ນັກຮຽນ ຈຳນວນ 27 ກ້ອນກຳລັງ, ກັນທຳ, ຜ້າປ່າສາມັກຄີ, ພິທີສູດຂວັນເຂົ້າ, ການປະກວດທິດາກອງເຂົ້າໃຫຍ່, ການສະແດງສິລະປະວັນນະຄະດີ, ການແຂ່ງຂັນນັກຮ້ອງສຽງດີ, ການແຂ່ງຂັນກິລາພື້ນເມືອງ, ການປະກວດອາຫານພື້ນເມືອງ, ທ່ອງທ່ຽວວັດທະນະທຳກອງເຂົ້າໃຫຍ່, ວິຖີການດຳລົງຊີວິດຂອງຄົນປ່າ, ການຕຳເຂົ້າ-ຟາດເຂົ້າແບບພື້ນເມືອງ ແລະ ການຕັກບາດຖວາຍສັງຂະທານ.

ນອກນີ້, ຍັງໄດ້ຈັດງານວາງສະແດງ ແລະ ຈຳໜ່າຍສິນຄ້າຂອງປະຊາຊົນຊາວເມືອງພຽງ, ສິນຄ້າ 1 ເມືອງ 1 ຜະລິດຕະພັນ (ODOP) ຂອງເມືອງພຽງ, ການວາງສະແດງຂອງຫ້ອງການຕ່າງໆ ແລະ ສິນຄ້າ ODOP ຈາກບັນດາແຂວງອ້ອມຂ້າງ, ຈາກ ສສ ຫວຽດນາມ ແລະ ຣາຊະອານາຈັກໄທ ລວມເກືອບ 100 ຫ້ອງວາງສະແດງ