ພະແນກແຜນການ ແລະ ການລົງທຶນ ນະຄອນຫຼວງວຽງຈັນ (ຜທ ນວ) ໄດ້ຈັດພິທີເຊັນສັນຍາດັດແກ້ ແລະ ເພີ່ມຕື່ມຂອງສັນຍາວ່າດ້ວຍການສຳປະທານທີ່ດິນ ເພື່ອກໍ່ສ້າງສະຖານທີ່ຈອດລົດ ແລະ ສະຖານທີ່ອອກກຳລັງກາຍ ຂອງມວນຊົນທົ່ວໄປ ໃນເນື້ອທີ່ 31,500 ຕາແມັດ ຢູ່ເມືອງສີສັດຕະນາກ ນະຄອນຫຼວງວຽງຈັນ ລະຫວ່າງອົງການປົກຄອງນະຄອນຫຼວງວຽງຈັນ ຕາງໜ້າ ໂດຍພະແນກຜທ ນວ ກັບບໍລິສັດ ໂຄລາວ ຣີສອດ ຈຳກັດ.
ພິທີເຊັນສັນຍາດັ່ງກ່າວມີຂຶ້ນໃນວັນທີ 8 ມັງກອນ 2018 ທີ່ ພະແນກແຜນການ ແລະ ການລົງທຶນ ນະຄອນຫຼວງວຽງຈັນ ລະຫວ່າງ ທ່ານ ພູຂົງ ບັນນາວົງ ຫົວໜ້າ ພະແນກ ຜທ ນວ ກັບ ທ່ານ ນາງ ຜົນດາລາ ສົມສະນິດ ຜູ້ອຳນວຍການ ບໍລິສັດ ໂຄລາວ ຣີສອດ ຈຳກັດໂດຍການເຂົ້າຮ່ວມເປັນສັກຂີພິຍານຂອງທ່ານ ໂພຄຳ ໄຊຍະສອນ ເຈົ້າເມືອງສີສັດຕະນາກ , ທ່ານ ປອ. ຄຳຂັນ ນະພາວົງ ປະທານຜູ້ບໍລິຫານ ກຸ່ມບໍລິສັດ ໂຄລາວ ພ້ອມດ້ວຍພາກສ່ວນກ່ຽວຂ້ອງ.
ການເຊັນສັນຍາຄັ້ງນີ້ມີຂຶ້ນໂດຍປະຕິບັດຕາມຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 0022/ຈນວ ລົງວັນທີ 5 ມັງກອນ 2018 ວ່າດ້ວຍການມອບສິດໃຫ້ເຊັນສັນຍາດັດແກ້ ແລະ ເພີ່ມຕື່ມຂອງສັນຍາວ່າດ້ວຍ ການສໍາປະທານເນື້ອທີ່ 31,500 ຕາແມັດ ຢູ່ເມືອງສີສັດຕະນາກ ນະຄອນຫຼວງວຽງຈັນ ສະບັບລົງວັນທີ 13 ມີນາ 2014 ຂອງບໍລິສັດ ໂຄລາວ ຣີສອດ ຈຳກັດ ເຊິ່ງໄດ້ດັດແກ້ບາງມາດຕາສັນຍາເຊັ່ນ: ດັດແກ້ກິດຈະການ, ເພີ່ມມູນຄ່າການລົງທຶນ ແລະ ອື່ນໆ.
ທ່ານ ປອ. ຄໍາຂັນ ນະພາວົງ ໄດ້ກ່າວວ່າ: ໂຄງການນີ້ຈະພັດທະນາ ໃຫ້ກາຍເປັນເຂດທ່ອງທ່ຽວ ຫຼື ສວນສາທາລະນະທ່ອງທ່ຽວໃນນະຄອນຫຼວງວຽງຈັນທີ່ເປັນແບບຢ່າງ. ໃນນີ້ຈະໄດ້ມີການສ້າງກິດຈະກໍາຫຼາຍຊະນິດເຊັ່ນ: ສະລອຍນໍ້າ, ເຄື່ອງຫຼິ້ນເດັກນ້ອຍ, ສະຖານທີ່ອອກກໍາລັງກາຍ, ບ່ອນພັກຜ່ອນ, ສະຖານທີ່ຂາຍເຄື່ອງຜະລິດຕະພັນພາຍໃນລາວ ແລະ ອື່ນໆ.ແຕ່ ການທີ່ຈະສ້າງນີ້ມັນບໍ່ແມ່ນການສ້າງຕະຫຼາດຄືກັບສະຖານທີ່ແຄມຂອງນະຄອນຫຼວງວຽງຈັນໃນປັດຈຸບັນ ແຕ່ຈະສ້າງເປັນແຫຼ່ງທ່ອງທ່ຽວເຮັດໃຫ້ສວຍງາມຕາທີ່ສຸດໃນເນື້ອທີ່ 31,500 ຕາແມັດ ຢູ່ເມືອງສີສັດຕະນາກ, ນະຄອນຫຼວງວຽງຈັນ.
ທ່ານກ່າວຕື່ມວ່າ: ສຳລັບ ໃນເບື້ອງຕົ້ນນີ້ ພວກຂ້າພະເຈົ້າກໍໄດ້ອອກເຫື່ອເທແຮງຂຽນບົດວິພາກຜ່ານຂະແໜງທີ່ກ່ຽວຂ້ອງ ເພື່ອລາຍງານໂຄງການດັ່ງກ່າວ ແລະ ພາຍຫຼັງເຊັນສັນຍານີ້ແລ້ວ ກໍຈະໄດ້ເລີ່ມລົງມືກໍ່ສ້າງ ດ້ວຍມູນຄ່າການລົງທຶນໃນເບື້ອງຕົ້ນປະມານ 10 ລ້ານໂດລາສະຫະລັດ.
ແຫລ່ງທີ່ມາຈາກຫນັງສືພິມ ເສດຖະກິດ ການຄ້າ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment