ຂປລ. ອີງຕາມການເປີດເຜີຍ ຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທີ່ໄດ້ໃຫ້ທິດຊີ້ນຳໃນກອງປະຊຸມວິຊາການ ຂະແໜງສ່ວຍສາອາກອນທົ່ວປະເທດ ເພື່ອສະຫລຸບຕີລາຄາການ ຈັດຕັ້ງປະຕິບັດວຽກງານໃນປີ 2017 ແລະ ທິດທາງການຈັດຕັ້ງປະຕິບັດປີ 2018, ຊຶ່ງຈັດຂຶ້ນໃນວັນທີ 15-17 ມັງກອນ 2018 ທີ່ສູນຮ່ວມມືສາກົນ ແລະ ການຝຶກອົບຮົມ (ICTC).
ກົມສ່ວຍສາອາກອນ ຈະຕ້ອງໄດ້ກວດຄືນຖານຂໍ້ມູນ ທີ່ມີຢູ່ແລ້ວໃຫ້ຖືກຕ້ອງກັບການດຳເນີນທຸລະກິດ ທີ່ເປັນອາກອນລາຍຮັບຕົວຈິງ ເພາະຕົວເລກບາງສ່ວນ ອາດແມ່ນຕົວເລກລາຍຮັບເດີມຜ່ານມາຫລາຍ ປີ ເຊັ່ນ: ທຸລະກິດໂຮງແຮມທີ່ໃຫ້ບໍລິການ ເສຍພັນທະຖືກຕ້ອງກັບຕົວຈິງແທ້ຫລືບໍ, ບັນດາແຂວງທີ່ມີລາຍຮັບຫລຸດຈາກປີກ່ອນ ກໍ່ຄວນເຂົ້າໄປກວດສອບເພື່ອຄວາມໂປ່ງໃສ.
ໃນຂະນະທີ່ ການເກັບຄ່າທຳນຽມທາງແບບທັນສະໄໝ ຖ້າທຽບໃສ່ປີຜ່ານມາ ຖືວ່າເພີ່ມຂຶ້ນຫລາຍເທົ່າ, ເພາະວ່າການເກັບຄ່າທຳນຽມທາງ ໃນແຕ່ລະປີ ສາມາດເກັບລາຍຮັບໄດ້ປະມານ 10 ຕື້ກີບ, ແຕ່ເມື່ອປ່ຽນມາໃຊ້ລະບົບ ການເກັບຜ່ານທະນາຄານການຄ້າຕ່າງປະເທດ ພຽງ 3-4 ເດືອນ ກໍສາມາດເກັບໄດ້ແລ້ວ 30 ຕື້ກີບ, ມູນຄ່າຕົວເລກດັ່ງກ່າວ, ແມ່ນຜິດໂຕນກັນຫລາຍພໍສົມຄວນ ເພາະໄດ້ລວມເອົາລົດຂອງລັດຖະບານ ເຂົ້າມາເສຍນຳດ້ວຍ ຈາກແຕ່ກ່ອນແມ່ນມີການຍົກເວັ້ນ.
ກ່ອນໜ້ານີ້, ທ່ານ ກົງຄຳ ສິດທິວໍລະດາ ຮອງຫົວໜ້າກົມສ່ວຍສາອາກອນ ກະຊວງການເງິນໄດ້ໃຫ້ສຳພາດຕໍ່ນັກຂ່າວການເງິນ ເມື່ອຕົ້ນເດືອນພະຈິກ 2017 ຜ່ານມາ, ໂດຍກ່າວວ່າ: ການເປີດນຳໃຊ້ລະບົບທັນສະໄໝເກັບຄ່າທຳນຽມທາງ ເປັນການສ້າງຄວາມໂປງໃສ, ສາມາດກວດສອບໄດ້ ແລະ ການເກັບລາຍຮັບເຂົ້າງົບປະມານແຫ່ງລັດ ຖືກຕ້ອງຕາມເວລາ-ຕາມມູນຄ່າຕົວຈິງ, ໂດຍເປີດນຳໃຊ້ລະບົບດັ່ງກ່າວພຽງ 7 ວັນ ຄື ວັນທີ 26 ຕຸລາ ຫາ 1 ພະຈິກ 2017 ສາມາດຈັດເກັບລາຍຮັບເຂົ້າງົບປະມານແຫ່ງລັດ ໄດ້ເຖິງ 1,2 ຕື້ກີບ. ຖ້າຫາກວ່າ ການຈັດຕັ້ງປະຕິບັດເກັບຄ່າທຳນຽມທາງປະຈຳປີ 2017 ສຳເລັດຕາມກຳນົດເວລາດັ່ງກ່າວ ຄື ນັບແຕ່ເດືອນຕຸລາ 2017 ຫາເດືອນມີນາ 2018 ຈະສ້າງລາຍຮັບໃຫ້ແກ່ຂະແໜງສ່ວຍສາອາກອນປະມານ 50 ຕື້ກີບ.
ຄຽງຄູ່ກັນນີ້, ກົມສ່ວຍສາອາກອນ ກະຊວງການເງິນ ຍັງໄດ້ສົມທົບກັບກະຊວງປ້ອງກັນຄວາມສະຫງົບ ກ່ຽວກັບມາດຕະການປັບໄໝ, ສຳລັບຜູ້ທີ່ລະເມີດລະບຽບ ຄ່າທຳນຽມທາງເຊັ່ນ ຜູ້ທີ່ຊຳລະເງິນຜ່ານທະນາຄານ ແຕ່ບໍ່ໄປຮັບເອົາສະຕິກເກີ້ພາຍໃນກຳນົດ 15 ວັນ ນັບແຕ່ມື້ກຳນົດເປັນຕົ້ນໄປ ຈະຖືກປັບໄໝ 5% ຂອງມູນຄ່າທີ່ໄດ້ຊຳລະໄປ, ບໍ່ເສຍຄ່າທຳນຽມຕາມເວລາທີ່ກຳນົດໄວ້ ກໍຈະຖືກປັບໄໝ 0,1% ຕໍ່ມື້ຂອງມູນຄ່າທີ່ຕ້ອງເສຍຄ່າທຳນຽມທາງປະຈຳປີ, ບໍ່ເສຍຄ່າທຳນຽມທາງໃນ 1 ປີຜ່ານມາ ຈະຖືກປັບໄໝ 40% ຕໍ່ປີ, ບໍ່ເສຍຄ່າທຳນຽມທາງ 2 ປີ ຂຶ້ນໄປຈະຖືກປັບໄໝ 60% ຕໍ່ປີ, ເສຍຄ່າທຳນຽມບໍ່ຖືກຕ້ອງຕາມທີ່ໄດ້ກຳນົດໄວ້ ຕ້ອງໄດ້ເສຍຄ່າທຳນຽມທາງຕື່ມໃຫ້ຄົບຖ້ວນ, ພ້ອມທັງປັບໃໝ 60%, ຖ້າປອມແປງການເສຍຄ່າທຳນຽມທາງ ທຸກຮູບແບບຕ້ອງຖືກປັບໄໝສອງເທົ່າ ແລະ ຈະຖືກລົງໂທດຕາມກົດໝາຍອາຍາຕາມແຕ່ລະກໍລະນີ.
ທ່ານ ກົງຄຳ ສິດທິວໍລະດາ ຍັງໃຫ້ຕື່ມວ່າ: ໄລຍະຂອງການເສຍຄ່າທຳນຽມທາງ ແມ່ນນັບແຕ່ເດືອນມັງກອນຮອດເດືອນມີນາ ຂອງທຸຸກໆປີ, ເຊິ່ງເປັນໄລຍະທີ່ບຸກຄົນ, ນິຕິບຸກຄົນ ແລະ ອົງການຈັດຕັ້ງ ຕ້ອງເສຍຄ່າທຳນຽມທາງປະຈຳປີ, ຖ້າບໍ່ເສຍທຳນຽມທາງຕາມເວລາທີ່ກຳນົດໄວ້ ກໍຈະຖືກປັບໄໝ ແລະ ຍັງໄດ້ອະທິບາຍຊີ້ແຈ້ງ ກ່ຽວກັບຂໍ້ຂ້ອງໃຈຂອງສັງຄົມກ່ຽວກັບລົດທີ່ຖືກຍົກເວັ້ນ ແມ່ນພາຫະນະຮັບໃຊ້ວິຊາສະເພາະ ຂອງອົງການຈັດຕັ້ງລັດບໍລິຫານ-ວິຊາການ, ສະມາຄົມ, ມູນນິທິ ທີ່ເຄື່ອນໄຫວຮັບໃຊ້ສາທາ ລະນະປະໂຫຍດ, ສຳລັບລົດລັດ (ປ້າຍສີຟ້າ) ກໍແມ່ນໄດ້ເສຍຄ່າທຳນຽມທາງເຊັ່ນດຽວກັນ ນັບແຕ່ລົດຮັບໃຊ້ບໍລິຫານທົ່ວໄປ ຈົນຮອດລົດຕຳແໜ່ງທຸກຂັ້ນ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment