ຂີ້ເຫຍື້ອທີ່ສັງຄົມສ້າງຂຶ້ນພວມເປັນບັນຫາທ້າທາຍໃນສັງຄົມບ້ານເຮົາ ຍ້ອນປະຊາຊົນບໍ່ເປັນເຈົ້າການໃນການເກັບມ້ຽນຂີ້ເຫຍື້ອໃນມືໂຕເອງ ຍັງມີແນວຄິດມັກງ່າຍຖີ້ມສິ່ງເສດເຫຼືອຖົງຢາງກະໂປ້ກະປ່ອງຊະຊາຍຕາມຖະໜົນຫົນທາງເອົາແຕ່ສະດວກ ແຕ່ຜູ້ເກັບກວາດນີ້ທີ່ລຳບາກ ຜ່ານສາຍຕາໃຜກໍ່ບໍ່ງາມ ບາງຄົນອັດດັງໃສ່ແຕ່ອາດເປັນຜູ້ມັກດຶກຂອງເສດເຫຼືອໃນມືເຊັ່ນດຽວກັນ.
ເພື່ອແກ້ໄຂບັນຫາດັ່ງກ່າວໃນວັນທີ 18 ມັງກອນ 2018 ທີ່ໂຮງແຮມລາວພລາຊາ ໄດ້ຈັດກອງປະຊຸມສະຫຼຸບວຽກງານໂຄງການ ພັດທະນາລະບົບການນຳໃຊ້ຂີ້ເຫຍື້ອໃຫ້ມີປະສິດທິຜົນ ໂດຍການຮ່ວມມືກັບປະຊາຊົນຢູ່ນະຄອນຫຼວງວຽງຈັນ ໂດຍມີທ່ານນາງ ວິໄລວອນ ຈັນທະລາຕີ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງ ຄບຕ ນວ ທ່ານ ໂຢຊິຮາຣຸ ຫົວໜ້າຫ້ອງການຜູ້ຕາງໜ້າຈາກອົງການໄຈກາ ປະຈຳລາວ ທ່ານຫົວໜ້າພະແນກສຳນັກງານນະໂຍບາຍສິ່ງແວດລ້ອມ ນະຄອນກຽວໂຕ ປະເທດຍີ່ປຸ່ນ ທ່ານຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ວິໄລວອນ ຈັນທະລາຕີ ກ່າວວ່າ: ຕະຫຼອດໄລຍະ 3 ປີ ທີ່ທາງໂຄງການໄດ້ດຳເນີນ ໄດ້ຮັບການສະໜັບສະໜູນທາງດ້ານງົບປະມານ ເຕັກນິກວິຊາການ ແລະ ການຮ່ວມມືຈາກອຳນາດການປົກຄອງທັງ 2 ນະຄອນ ສິ່ງທີ່ພົ້ນເດັ່ນໃນໂຄງການຈັດຕັ້ງປະຕິບັດ ແມ່ນພະນັກງານວິຊາການຜູ້ເຮັດວຽກຕົວຈິງກ່ຽວກັບການຄຸ້ມຄອງຂີ້ເຫຍື້ອ ແລະ ອຳນາດການປົກຄອງທີ່ກ່ຽວຂ້ອງ ໄດ້ຮັບການຍົກລະດັບທາງດ້ານຄວາມຮູ້ຄວາມສາມາດ ໂດຍການຜ່ານການອົບຮົມຢູ່ພາຍໃນ ແລະ ຕ່າງປະເທດ ລວມທັງການທັດສະນະສຶກສາ ໂຄງການຍັງໄດ້ສ້າງປື້ມຄູ່ມື ແລະ ການປູກຈິດສຳນຶກໃຫ້ກັບອຳນາດການປົກຄອງ ໂຮງຮຽນ ລວມທັງພໍ່ແມ່ປະຊາຊົນ ໂດຍການນຳໃຊ້ເຕັກນິກຫຼັກການ 3R (Reuse Reduce Recycle) ຫຼຸດຜ່ອນໃຊ້ຄືນແປຮູບ ເຊິ່ງບົດຮຽນເຫຼົ່ານີ້ເປັນຜົນປະໂຫຍດ ເຮັດໃຫ້ການແກ້ໄຂບັນຫາການຖິ້ມຂີ້ເຫຍື້ອຊະຊາຍຢູ່ໃນ ນວ ນັບມື້ຫຼຸດລົງ.
ຜົນງານທີ່ພົ້ນເດັ່ນອີກອັນໜຶ່ງຂອງໂຄງການ ເຫັນໄດ້ຈາກຕົວຊີ້ວັດທີ່ເປັນຮູບປະທຳທີ່ເກີດຂຶ້ນຢູ່ 4 ບ້ານຕົວແບບຂອງ 4 ເມືອງ ໃນ ນວ ເມືອງຈັນທະບູລີ ບ້ານອານຸ ສີໂຄດຕະບອງ ບ້ານອາກາດ ໄຊເຊດຖາ ບ້ານທາດຫຼວງກາງ ແລະ ເມືອງສີສັດຕະນາກ ບ້ານເກົ້າຍອດ ລວມທັງໂຮງຮຽນອີກຈຳນວນໜຶ່ງ ທີ່ເຂົ້າຮ່ວມໂຄງການ ໄດ້ມີການນຳໃຊ້ເຕັກນິກຕ່າງໆ ເຂົ້າໃນການຮຽນຮູ້ກຳຈັດຂີ້ເຫຍື້ອໃນຫຼາຍຮູບແບບ ປະກອບສ່ວນເຂົ້າໃນການຫຼຸດຜ່ອນອັດຕາຂີ້ເຫຍື້ອຂອງນະຄອນຫຼວງ.
ແນວໃດກໍ່ຕາມໃນພາບລວມແລ້ວໃນນະຄອນຫຼວງວຽງຈັນ ຕາມຖະໜົນຫົນທາງຫຼາຍບ່ອນຍັງເຕັມແຕ່ຂີ້ເຫຍື້ອ ໂດຍສະເພາະເຂດແຄມຂອງເຫັນແລ້ວເໝິດຄຳຊິເວົ້າກັບຄົນທີ່ຖີ້ມ ເມື່ອ2-3 ປີຫຼັງມີອາສາຕ່າງປະເທດມາເລາະເກັບໃຫ້ ແທນທີ່ຈະຕື່ນຕົວຮັກສາ ພັດວ່າຖີ້ມຫຼາຍກວ່າເກົ່າ, ເສັ້ນທາງຫຼວງແຫ່ງຊາດຫຼາຍເສັ້ນກໍ່ມີຂີ້ເຫຍື້ອຢາຍເຕັມຍ້ອນປະຊາຊົນບໍ່ຮ່ວມມື ເຈົ້າຖີ້ມຂ້ອຍຖີ້້ມກໍ່ເປັນກອງຂຶ້ນມາ ບັນຫານີ້ຈະແກ້ໄຂໄດ້ຕ້ອງເລີ່ມທີ່ການປູກຈິດສຳນຶກແກ່ປະຊາຊົນໃຫ້ຮູ້ຮັກສິ່ງແວດລ້ອມ, ຮັກຄວາມສະອາດສວຍງາມ ຂໍໃຫ້ທຸກຄົນຊ່ວຍກັນເກັບຂີ້ເຫຍື້ອໃນມືໄປໃສ່ກະຕ່າຂີ້ເຫຍື້ອພຽງເທົ່ານີ້ບ້ານເຮົາກໍ່ໜ້າຢູ່ຫຼາຍຂຶ້ນ.
ຂອບໃຈແຫຼ່ງຂ່າວຈາກໜັງສືພິມວຽງຈັນໃໝ່
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment