ຂປລ. ຄະນະກຳມະການ ຈັດງານປີທ່ອງທ່ຽວ ແຂວງຈຳປາສັກ ໄດ້ພ້ອມກັນ ຕົກລົງເຫັນດີກຳນົດເອົາ 8 ກິດຈະກຳຫລັກ ເພື່ອສົ່ງເສີມ ການທ່ອງທ່ຽວ ກໍຄື ດຶງດູດ ເອົານັກທ່ອງທ່ຽວຈາກພາຍໃນ ແລະ ຕ່າງປະເທດ ເຂົ້າມາທ່ຽວ ພາຍໃນແຂວງ ເພື່ອເປັນການ ສ້າງລາຍຮັບໃຫ້ ແຂວງ ແລະ ປະຊາຊົນ ໃນໂອກາດ ເປີດປີທ່ອງທ່ຽວລາວ 2018.
ທ່ານ ນາງ ມາລາ ຈັນທະລາມ ຮອງຫົວໜ້າ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ ຈຳປາສັກ ໃຫ້ສຳພາດ ເມື່ອອາທິດຜ່ານມານີ້ວ່າ: 8 ກິດຈະກຳ ສຳລັບປີທ່ອງທ່ຽວລາວ 2018 ຂອງ ແຂວງຈຳປາສັກ ທີ່ໄດ້ກຳນົດມີ ຄື ງານບຸນນະມັດສະການ ຜາສາດຫີນວັດພູ, ບຸນຊ້າງ ບ້ານກຽດໂງ້ງ ເມືອງປະທຸມພອນ (ສອງງານດັ່ງກ່າວ ນີ້ໄດ້ຈັດໄປແລ້ວ), ບຸນພະເວດ ເມືອງຊະນະສົມບູນ (ເດືອນມີນາ), ບຸນປີໃໝ່ລາວ ເມືອງປາກເຊ (ເດືອນເມສາ), ບຸນບັ້ງໄຟ ເມືອງໂພນທອງ (ເດືອນພຶດສະພາ), ງານເທດສະການ ໝາກໄມ້ສົດ ເມືອງບາຈຽງ (ເດືອນມິຖຸນາ), ຄາລາວານລົດຖີບ ແລະ ງານບຸນ ປະວໍລະນາອອກພັນສາ ເມືອງປາກເຊ (ເດືອນຕຸລາ).
ໃນບັນດາ 8 ກິດຈະກຳດັ່ງກ່າວນີ້, ຖືເປັນກິດຈະກໍາຫລັກ ໃຫ້ບັນດາ 10 ເມືອງ ທົ່ວແຂວງຈຳປາສັກ ໂດຍ ໄດ້ແບ່ງອອກເປັນ 4 ກຸ່ມ ໃນການ ຈັດຕັ້ງປະຕິບັດ, ເຊິ່ງແຕ່ລະກຸ່ມ ລ້ວນແລ້ວແຕ່ມີສະຖານທີ່ທ່ອງທ່ຽວ ທາງດ້ານປະຫວັດສາດ, ວັດທະນະທຳ ແລະ ທຳມະຊາດ ທີ່ຫລວງຫລາຍ ແລະ ສວຍງາມ.
ປັດຈຸບັນນີ້, ແຕ່ລະກຸ່ມ ກຳລັງຂຸ້ນຂ້ຽວກະກຽມຄວາມພ້ອມ ດ້ານຕ່າງໆເຊັ່ນ: ການໂຄສະນາເຜີຍແຜ່, ການພັດທະນາ ພື້ນຖານໂຄງລ່າງ, ການຮັກສາ ຄວາມສະຫງົບ ແລະ ຄວາມປອດໄພ, ການຮັກສາ ຄວາມສະອາດຂອງ ສະຖານທີ່ທ່ອງທ່ຽວ, ການປັບປຸງ ສິ່ງອຳນວຍຄວາມສະດວກ, ສະຖານທີ່ ພັກພາອາໃສ ລວມທັງການ ຜະລິດສິນຄ້າ ທີ່ເປັນຂອງ ທີ່ລະນຶກສຳລັບນັກທ່ອງທ່ຽວ.
ໃນຂະນະດຽວກັນ, ທາງຄະນະກຳມະການ ຈັດງານປີທ່ອງທ່ຽວແຂວງ ກໍໄດ້ລົງຊຸກຍູ້, ຕິດຕາມ ແລະ ເອົາໃຈໃສ່ ໃຫ້ແກ່ບັນດາເມືອງຕ່າງໆ ລວມທັງຫົວໜ່ວຍທຸລະກິດ ດ້ານທ່ອງທ່ຽວ ໃຫ້ມີຄວາມພ້ອມ ບໍ່ວ່າ ຈະເປັນດ້ານການປັບປຸງ ຍົກລະດັບຂອດການບໍລິການ, ການຍົກລະດັບ ຄວາມຮູ້ຄວາມສາມາດ ຂອງບຸກຄະລາກອນ, ພາຫະນະ ສຳລັບບໍລິການນັກທ່ອງທ່ຽວ ໃຫ້ມີຄວາມພ້ອມ ແລະ ພຽງພໍ ແລະ ອື່ນໆ. ນອກຈາກ 8 ກິດຈະກຳຫລັກແລ້ວ ຍັງມີບັນດາ ກິດຈະກຳຍ່ອຍອື່ນໆ ນຳອີກ ຂອງແຕ່ລະເມືອງ, ແຕ່ລະທ້ອງຖິ່ນ ທີ່ເປັນເອກະລັກ ທາງດ້ານວັດທະນະທຳ ແລະ ຮີດຄອງປະເພນີ.
ປັດຈຸບັນ, ແຂວງຈຳປາສັກ ມີສະຖານທີ່ທ່ອງທ່ຽວທັງໝົດ 216 ແຫ່ງ, ໃນນັ້ນມີແຫລ່ງທ່ອງທ່ຽວ ທາງທຳມະຊາດ 116 ແຫ່ງ, ປະຫວັດສາດ 40 ແຫ່ງ ແລະ ວັດທະນະທຳ 60 ແຫ່ງ.
ໃນປີ 2017 ມີ ນັກທ່ອງທ່ຽວ ເຂົ້າມາແຂວງດັ່ງກ່າວ, 799.054 ເທື່ອຄົນ, ສ້າງລາຍຮັບຫລາຍກວ່າ 123 ລ້ານໂດລາ ສະຫະລັດ. ສະເພາະ ປີທ່ອງທ່ຽວລາວ 2018 ນີ້, ຄາດວ່າຈະມີນັກທ່ອງທ່ຽວ ເຂົ້າມາບໍ່ຫລຸດ 917.700 ເທື່ອຄົນ, ຄາດຄະເນ ສ້າງລາຍຮັບປະມານ 140 ລ້ານໂດລາສະຫະລັດ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment