ບໍ່ຢາກຈະເຊື່ອ ສອງບໍລິສັດຢາສູບລາຍໃຫຍ່ໃນລາວຍັງບໍ່ປະຕິບັດຂໍ້ກົດໝາຍ
ເປັນການຖະແຫຼງການຢືນຢັນຈາກອົງການອະນາໄມໂລກກ່ຽວກັບບໍລິສັດຜະລິດຢາສູບລາຍໃຫຍ່ຂອງລາວ 2 ແຫ່ງທີ່ຍັງບໍ່ທັນປະຕິບັດຕາມລະບຽບກົດໝາຍ ແລະມີການຍື່ນຂໍເລື່ອນເວລາຕິດຕໍ່ກັນ 3 ຄັ້ງແລ້ວ ນັ້ນກໍ່ຄືບໍລິສັດ ຢາສູບລາວ ຈຳກັດ ແລະ ບໍລິສັດ ຢາສູບຫົງຖາ ໂຊກດີລາວ-ຈີນ ຈຳກັດ.
ຢາສູບນັບເປັນສິນຄ້າທີ່ສົ່ງຜົນກະທົບຕໍ່ສຸຂະພາບຢ່າງໜຶ່ງ ແຕ່ຄວາມນິຍົມຂອງສັງຄົມຍັງຄົງມີຫຼາຍ ແລະມີການອະນຸຍາດໃຫ້ຂາຍໄດ້ທົ່ວໄປຕາມທ້ອງຕະຫຼາດຈິ່ງເປັນການຍາກທີ່ຈະຄວບຄຸມໃຫ້ຢູ່ໃນຂອບທຸກຢ່າງ ແນວໃດກໍ່ດີຕອນນີ້ເຖິງເວລາທີ່ຕ້ອງເອົາໃຈໃສ່ຢ່າງຈິງຈັງ ເພື່ອປັບປຸງການສະໜອງສິນຄ້າ ແລະບໍລິການໃຫ້ເປັນໄປຕາມລະບຽບກົດໝາຍ.
ຕາມຂໍ້ມູນຈາກອົງການອະນາໄມໂລກ ບໍລິສັດ ຢາສູບລາວ ຈຳກັດ ແລະ ບໍລິສັດ ຢາສູບຫົງຖາ ໂຊກດີລາວ-ຈີນ ຈຳກັດ ຍັງບໍ່ທັນຈັດຕັ້ງປະຕິບັດຂໍ້ຕົກລົງຂອງລັດຖະມົນຕີ ກະຊວງສາທາລະນະສຸກ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍຢາສູບ ທີ່ລັດຖະບານ ກໍ່ຄືກະຊວງສາທາລະນະສຸກ ໄດ້ວາງອອກ ໃນເດືອນພຶດສະພາ 2016.
ຂໍ້ກຳນົດດັ່ງກ່າວໄດ້ລະບຸໄວ້ ຢາສູບທັງຜະລິດພາຍໃນ ແລະ ນຳເຂົ້າຈາກຕ່າງປະເທດ ເພື່ອມາຈຳໜ່າຍຢູ່ລາວ ຕ້ອງພິມຄຳເຕືອນສຸຂະພາບເປັນຮູບພາບຂະໜາດ 75% ໃສ່ຊອງ ແລະ ຕຸດຢາສູບ ເຊິ່ງການຈັດຕັ້ງປະຕິບັດຜ່ານມາ ບໍລິສັດຜູ້ນຳເຂົ້າຢາສູບສ່ວນໃຫຍ່ ແມ່ນຈັດຕັ້ງປະຕິບັດໄປເປັນທີ່ຮຽບຮ້ອຍແລ້ວ ທີ່ເຫຼືອກໍ່ມີພຽງແຕ່ຜູ້ຜະລິດຢາສູບລາຍໃຫຍ່ພາຍໃນປະເທດ ຄື: ບໍລິສັດ ຢາສູບລາວ ຈຳກັດ ແລະ ບໍລິສັດ ຢາສູບຫົງຖາ ໂຊກດີລາວ-ຈີນ ຈຳກັດ ບໍ່ທັນປະຕິບັດຕາມຂໍ້ກຳນົດດັ່ງກ່າວ.
ທ່ານນາງ ຈູຣຽດ ໄຟລໂຊຄ໌ ຜູ້ຕາງໜ້າອົງການອະນາໄມໂລກ ປະຈຳລາວ ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 6 ກຸມພາ 2018 ວ່າ: ປີ 2016 ລັດຖະບານລາວໄດ້ສ້າງຜົນສຳເລັດອັນໃຫຍ່ຫຼວງ ດ້ວຍການອອກຂໍ້ຕົກລົງຂອງລັດຖະມົນຕີກະຊວງສາທາລະນະສຸກ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍຢາສູບ ທີ່ຜະລິດຢູ່ພາຍໃນ ແລະ ນຳເຂົ້າຈາກຕ່າງປະເທດ ມາຈຳໜ່າຍໃນລາວ ຕ້ອງມີຄຳເຕືອນສຸຂະພາບທີ່ເປັນຮູບພາບ ເຊິ່ງຂໍ້ຕົກລົງສະບັບດັ່ງກ່າວ ມີຜົນສັກສິດ 120 ວັນ ພາຍຫຼັງທີ່ຈົດໝາຍເຫດທາງລັດຖະການ ມີຜົນບັງຄັບໃຊ້ແຕ່ວັນທີ 7 ພະຈິກ 2016.
ໃນການປະກາດຂໍ້ຕົກລົງທີ່ວ່ານັ້ນສອງບໍລິສັດລ້ວນຮັບຮູ້ດີຈິ່ງໄດ້ຍື່ນໜັງສືຕໍ່ລັດຖະບານລາວ ໃຫ້ເລື່ອນຄຳເຕືອນສຸຂະພາບເປັນຮູບພາບອອກໄປຕື່ມ ຊຶ່ງໄດ້ຂໍເລື່ອນເປັນຈຳນວນ 3 ຄັ້ງແລ້ວ ລວມເປັນເວລາ 19 ເດືອນ ຕັ້ງທີ3 ໝົດກຳນົດໃນວັນທີ 1 ມັງກອນ 2018. ບໍລິສັດຈະປະຕິບັດຕາມນະໂຍບາຍຂອງລັດຫຼືບໍໍ່ຕ້ອງຕິດຕາມຕອນຕໍ່ໄປ.
ຂອບໃຈແຫຼ່ງຂ່າວຈາກໜັງສືພິມວຽງຈັນໃໝ່
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment