ຜາກະຕ່າຍຈຸດຊົມວິວ360ອົງສາ ເມືອງຍົມມະລາດແຂວງຄຳມ່ວນ ຕາມເສັ້ນທາງເລກທີ 12

ຈາກການສຳຫລວດແຫລ່ງທ່ອງທ່ຽວຢູ່ແຂວງ ຄຳມ່ວນ ປະຈຸບັນມີທັງໝົດ 198 ແຫ່ງ, ໃນນັ້ນມີແຫລ່ງທ່ອງທ່ຽວທາງທຳມະຊາດ 139 ແຫ່ງ, ທາງປະຫວັດສາດມີ 29 ແຫ່ງ ແລະ ທ່ອງທ່ຽວທາງວັດທະນະທຳມີ 30 ແຫ່ງ .

ສ່ວນຜາກະຕ່າຍຈຸດຊົມວິວ360ອົງສາ ເມືອງຍົມມະລາດແຂວງຄຳມ່ວນ ຕາມເສັ້ນທາງເລກທີ 12 (ເສັ້ນທາງໄປເຂື່ອນນ້ຳເທີນ2). ຫ່າງຈາກຕົວເມືອງທ່າແຂກປະມານ50ກິໂລແມັດ.
ຜາກະຕ່າຍສູງຈາກລະດັບນ້ຳທະເລ 260 ແມັດ ແລະເສັ້ນທາງຢ່າງຂຶ້ນໄປຮອດຈຸດຊົມວິວ750ແມັດ ບອກໄວ້ເລີຍວ່າເສັ້ນທາງຍ່າງຂຶ້ນໄປສຸດສຽວບໍ່ເໝາະກັບຄົນຢ້ານຄວາມສູງ.

ຈຸດເດັ່ນແມ່ນເມື່ອຂຶ້ນໄປຮອດສາລາຊົມວິວແລ້ວ ຈະສາມາດແນມເຫັນຕົວເມືອງຍົມມະລາດ ແລະສາຍພູຜາທີ່ອ້ອມຮອບເມືອງແຫ່ງນີ້ເປັນຢ່າງດີ.

ຢ່າງໃດກໍຕາມ ຍາມນີ້ ເປັນລະດູແລ້ງ ພາບຕົວເມືອງຫລື ທຳມະຊາດ ຈິ່ງບໍ່ຄ່ອຍງາມປານໃດ ແຕ່ຫາກໄປໃນຕົ້ນລະດູຝົນ ຫລື ຍາມເຮັດນາ ຈົນເຖິງກ່ອນເກັບກ່ຽວ ຈະມີຄວາມງົດງາມເປັນພິເສດກວ່ານີ້ແນ່ນອນ.

ແຂວງຄຳມ່ວນມີຄະນົບທຳນຽມຮີດຄອງປະເພນີອັນດີງາມ, ປະຊາ ຊົນຊາວແຂວງຄຳມ່ວນ ເປັນຄົນທີ່ມີຈິດໃຈໂອບເອື້ອເພື່ອແຜ່, ຮັກແພງແຂກຕ່າງດ້າວ-ທ້າວຕ່າງແດນ, ແຂວງຄຳມ່ວນ ເປັນ ດິນແດນທີ່ມີແຕ່ສັນຕິສຸກ, ມີແຫລ່ງທ່ອງທ່ຽວທີ່ເລື່ອງລືທົ່ວໂລກເປັນຕົ້ນແມ່ນ: ຖໍ້າມະຫັດສະຈັນກອງລໍ-ນາຕານ, ຖໍ້ານໍ້າ ລອດເຊບັ້ງໄຟ, ຖໍ້ານາງແອ່ນ, ຂຸນກອງແລງ, ນໍ້າຕົກຕາດນໍ້າສະນາມ, ປ່າສະຫງວນພູຫີນໜາມໜໍ່ ທີ່ສວຍງາມເຊິ່ງກຽມຮັບ ຮອງເປັນມໍລະດົກໂລກທາງທຳມະຊາດ ແລະ ສະຖານທີ່ອື່ນໆ ທີ່ທ່ານຄວນເລືອກເປັນຫນຶ່ງໃນເປົ້າໝາຍປາຍທາງການທ່ອງທ່ຽວ.

ນອກນັ້ນຍັງມີແຫລ່ງທ່ອງທ່ຽວທີ່ສຳຄັນທາງປະຫວັດສາດ ແລະ ວັດທະນະທຳຫລາຍແຫ່ງທີ່ເປັນມົນສະເໜ່ມັດໃຈຜູ້ຄົນທີ່ມາທົ່ວສາລະທິດ ໃນນີ້ມີພະທາດສີໂຄດຕະບອງ ເຊິ່ງເປັນປູ ຊະນີຍະສະຖານ ແລະ ເປັນສັນຍາລັກຂອງປະຊາຊົນຊາວແຂວງຄຳມ່ວນ, ມີພະທາດຕຸ້ມພະວັງ ຢູ່ບ້ານນາວາງ, ຫໍໄຫວ້ປະ ທານໂຮຈິມິນ ຢູ່ບ້ານຊຽງຫວາງ ເມືອງໜອງບົກ….