ຫຼວງນໍ້າທາ ເປີດງານມະໂຫລານ 17 ເຜົ່າ ແລະ ປີທ່ອງທ່ຽວລາວ

ໃນຕອນເຊົ້າຂອງວັນທີ 19 ມີນາ 2018 ແຂວງຫຼວງນ້ຳທາໄດ້ເປີດງານມະໂຫລານ 17 ເຜົ່າ ແລະ ປີທ່ອງທ່ຽວລາວຂຶ້ນຢຸ່ທີ່ສະໜາມກິລາໃໝ່ຂອງແຂວງ ໂດຍການເປັນປະທານຂອງທ່ານ ເພັດຖາວອນ ພິລະວັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ ເປັນກຽດເຂົ້າຮ່ວມຂອງທ່ານ ອຸ່ນທວງ ຂາວພັນ ກຳມະການປະຈຳພັກ ກະຊວງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມີບັນດາການນໍາບັນດາແຂວງ ແລະ ປະຊາຊົນແຂວງຫຼວງນໍ້າທາເຂົ້າຮ່ວມ.

ເປີດງານມະໂຫລານ 17 ເຜົ່າ ແລະ ປີທ່ອງທ່ຽວລາວ 2018 ຢູ່ທີ່ແຂວງຫຼວງນໍ້າທາຄັ້ງນີ້ ເພື່ອເປັນການເຜີຍແຜ່ແນວທາງນະໂຍບາຍຂອງພັກ-ລັດ ກໍ່ຄືຜົນສຳເລັດໃນການສ້າງສາພັດທະນາແຂວງຫຼວງນໍ້າທາຂອງປະຊາຊົນບັນດາເຜົ່າ, ສະແດງເຖິງວັດທະນາທຳອັນດີງາມຂອງແຂວງ ທັງໃນດ້ານການເມືອງ, ເສດຖະກິດ ແລະ ວັດຖະນາທຳສັງຄົມ ລວມທັງທ່າແຮງໃນການພັດທະນາຂອງແຂວງ ໃຫ້ຫຼຸດພົ້ນອອກຈາກຄວາມດ້ວຍພັດທະນາໃນປີ 2020 ລວມທັງເປັນການສຶບຕໍ່ ສົ່ງເສີມການທ່ອງທ່ຽວຂອງແຂວງໃຫ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.

ທ່ານ ບຸນຍີ່ ແກ້ວຄຸນເມືອງ ຮອງເລຂາພັກແຂວງ ຮອງເຈົ້າແຂວງໆຫຼວງນ້ຳທາ ກ່າວຕໍ່ພິທີເປີດງານມະໂຫລານ 17 ເຜົ່າ ແລະ ປີທ່ອງທ່ຽວລາວ 2018 ຢູ່ແຂວງຫຼວງນ້ຳທາວ່າ: ການກະກຽມໄດ້ເລີ່ມແຕ່ເດືອນຕຸລາ 2017 ,ທ່ານເຈົ້າແຂວງໄດ້ອອກຂໍ້ຕົກລົງແຕ່ງຕັ້ງຄະນະຊິ້ນຳຂັ້ນແຂວງ ແລະ ບັນດາອານຸກຳມະການ,ກໍ່ໄດ້ຈັດກອງປະຊຸມປຶກສາຫາລືວຽກງານທີ່ກ່ຽວຂ້ອງ,ຮັບຮອງເອົາລາຍການກິດຈະກຳ ແລະ ວາງແຜນການເຄື່ອນໄຫວຕະຫຼອດປີ 2018 ຢູ່ທັງບັນດາເມືອງ ແລະ ແຂວງ,ການຫ້າງຫາກະກຽມຜ່ານມາວຽກງານແຕ່ລະດ້ານສ່ວນໃຫຍ່ແມ່ນປະຕິບັດຕາມແຜນການ ແລະ ຄາດໝາຍກຳນົດໄວ້.

ບັນດາການຈັດຕັ້ງຂອງພັກ-ລັດ,ອົງການຈັດຕັ້ງສັງຄົມ ແລະ ມວນຊົນຊາວຫຼວງນ້ຳທາໄດ້ໃຫ້ຄວາມສົນໃຈ ແລະ ສະໜັບສະໜູນການກະກຽມການຈັດງານເປັນຢ່າງດີ,ວັນທີ 27 ທັນວາໄດ້ຖະແຫຼງການຕໍ່ຄະນະນຳຂັ້ນແຂວງ,ບັນດາເມືອງ ແລະ ສື່ມວນຊົນທີ່ສະໂມສອນຂອງແຂວງຫຼວງນ້ຳທາເພື່ອປຸກລະດົມປວງຊົນໃຫ້ມີສ່ວນຮ່ວມໃນການສ້າງຂະບວນການ,ມາຮອດວັນທີ 14 ມີນາ 2018 ງານມະໂຫລານ 17 ເຜົ່າ ແລະ ປີທ່ອງທ່ຽວລາວ 2018ທີ່ແຂວງຫຼວງນ້ຳທາກໍ່ໄດ້ໄຂຂື້ນ ແລະ ມີກິດຈະກຳຄື:ງານວາງສະແດງຈຳລອງວັດທະນະທຳ 17 ເຜົ່າແຕ່ລະເຜົ່າຈະມີຄວາມແຕກຕ່າງກັນທາງດ້ານວິຖິການດຳລົງຊີວິດ ແລະ ຮິດຄອງປະເພນີອັນດີງາມຂອງແຕ່ລະເຜົ່າ,ງານວາງສະແດງ ແລະ ຈຳໜ່າຍເປັນຕົ້ນແມ່ນສິນຄ້າກະສິກຳ,ອຸດສາຫະກຳ ແລະ ຫັດຖະກຳທີ່ເປັນມູນເຊື້ອຂອງປະຊາຊົນບັນດາເຜົ່າທີ່ມາຈາກບັນດາເມືອງພາຍໃນແຂວງຫຼວງນ້ຳທາ,ບັນດາແຂວງ ແລະ ສິນຄ້າຈາກລາຊາອານາຈັກໄທ,ສປ ຈີນ,ສສ ຫວຽດນາມ ແລະ ກິດຈະກຳກິລາປະກອບມີ 5 ປະເພດຄື: ການຍ່າງມິນີມາລາທອນ,ຂີ່ລົດຖີບເພື່ອສຸຂະພາບຍິງ-ຊາຍ,ເປຕັງຍິງ-ຊາຍ,ເຕະບານຊີງຂັນເຈົ້າແຂວງໆຫຼວງນ້ຳທາ ແລະ ຕີມວຍ,ສະແດງສີລະປະວັນນະຄະດີບັນດາເມືອງ 15 ລາຍການ,ພາຍໃນເທດສະບານ 51 ລາຍການ,ເດີນແບບອາພອນ 17 ເຜົ່າ ແລະ ເທດສະການອາຫານ 29 ລາຍການ.

ໂອກາດດຽວກັນນີ້ທ່ານ ເພັດຖາວອນ ພິລະວັນ ເຈົ້າແຂວງໆຫຼວງນໍ້າທາ ໄດ້ໃຫ້ຮູ້ເຖິງສະພາບຈຸດພິເສດ ແລະ ທ່າແຮງຂອງແຂວງຫຼວງນໍ້າທາ ໂດຍໄດ້ກໍານົດເອົາວຽກງານການທ່ອງທ່ຽວເປັນທ່າແຮງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມເຮັດໃຫ້ແຂວງຫຼວງນໍ້າທາໄດ້ຮັບການພັດທະນາເຕີບໃຫຍ່ເຂັ້ມແຂງຂຶ້ນເທື່ອລະກ້າວ.

ຈາກນັ້ນທ່ານ ເພັດຖາວອນ ພິລະວັນ ເຈົ້າແຂວງໆຫຼວງນໍ້າທາໄດ້ຂຶ້ນລັ່ນຄ້ອງ 9 ບາດ, ພ້ອມກັບທ່ານ ບຸນຍີ່ ແກ້ວຄຸນເມືອງ ຮອງເຈົ້າແຂວງໆຫຼວງນໍ້າທາ ປະທານຈັດງານມະໂຫລານ 17 ເຜົ່າ ແລະ ປີທ່ອງທ່ຽວລາວປີ 2018 ທີ່ແຂວງຫຼວງນໍ້າທາພ້ອມດ້ວຍທ່ານ ອຸ່ນທວງ ຂາວພັນ ກຳມະການປະຈຳພັກກະຊວງຮອງລັດຖະມົນຕີກະຊວງຖະຫຼວງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຮ່ວມຕັດແຖບຜ້າເປີດງານຢ່າງເປັນທາງການ ແລະ ໄດ້ມີການເດີນກ້ອນກໍາລັງ 17 ເຜົ່າຢູ່ແຂວງຫຼວງນໍ້າທາ ທີ່ສະແດງເຖິງມູນເຊື່ອວັດທະນະທໍາອັນເປັນເອກະລັກຂອງເຜົ່າ.

ຈາກນັ້ນບັນດາຜູ້ແທນ ແຂກການນໍາທັງພາຍໃນ ແລະ ຕ່າງປະເທດໄດ້ທ່ຽວຊົມການວາງສະແດງຜົນງານຂອງພະແນກການ, ຜະລິດຕະພັນກະສິກໍາ-ອຸດສາຫະກໍາ ແລະ ຫັດຖະກໍາບັນດາເຜົ່າທີ່ມີຄວາມແຕກຕ່າງກັນທາງດ້ານວິຖີຊີວິດ ພ້ອມທັງຊີມລົດຊາດອາຫານອັນເປັນເອກະລັກຂອງບັນດາເຜົ່າ ແລະ ຕອນຄໍ່າໄດ້ມີການສະແດງສິລະປະວັນນະຄະດີ ແລະ ເດີນແບບອາພອນເຜົ່າ 17 ເຜົ່າຕື່ມອີກ.

ການຈັດງານມະໂຫລານ 17 ຊົນເຜົ່າ ແລະ ປີທ່ອງທ່ຽວລາວ 2018 ທີ່ແຂວງຫຼວງນໍ້າທາໄດ້ເລີ່ມຕັ້ງແຕ່ວັນທີ 14 ມີນາ ປີ 2018 ຫາ ວັນທີ 20 ມີນາ 2018 ເຊິ່ງເປັນການເອກອ້າງ ວັດທະນາທຳອັນດີງານຂອງ 17 ເຜົ່າຄື: ເຜົ່າລາວ, ແລນແຕນ, ລະເມດ, ອາຄາ, ອິວມຽນ, ຢ້າວ: ລາຫູ, ຢັ້ງ, ສີດາ, ມົ້ງ, ບິດ, ກຶມມຸ(ແກວນ), ພູນ້ອຍ, ໄຕ໋ເໜືອ, ຢວນ, ລື້, ໄຕ໋ແດງ ແລະ ເຜົ່າໄຕ໋ດຳ ທັງເປັນການຢັ້ງຢືນເຖິງຜົນງານຂອງພັກ, ອົງການປົກຄອງແຕ່ລະຂັ້ນກໍ່ຄືຫົວໜ້າໜ່ວຍທຸລະກິດທີ່ໄດ້ມີການເຕີບໃຫຍ່ຂະຫຍາຍຕົວ, ເຊິ່ງ ມີຜະລິດຕະພັນອອກສູ່ຕະຫຼາດໃຫ້ສັງຄົມຊົມໃຊ້ ແລະ ກາຍເປັນສິນຄ້າສົ່ງອອກ ນັບມື້ນັບຫຼາຍ ເປັນການຊຸກຍູ້ການລົງທຶນ ແລະ ດຶງດູດນັກທ່ອງທ່ຽວມາທ່ຽວຊົມຫຼາຍຂຶ້ນກວ່າເກົ່າ.