ໃນຕອນເຊົ້າວັນທີ 26 ມີນາ 2018 ນີ້ ອົງການພຸດທະສາສະໜາສໍາພັນລາວ ເມືອງໄຊຍະບູລີ ໄດ້ນໍາເອົາເຄື່ອງຊ່ວຍເຫຼືອຈໍານວນໜຶ່ງມູນຄ່າຫຼາຍກ່ວາ 5 ລ້ານກີບ ມອບໃຫ້ໂຮງຮຽນປະຖົມ ແລະ ຄອບຄົວຂາດເຂີນທຸກຍາກຢູ່ບ້ານຫ້ວຍເພາະ ເມືອງໄຊຍະບູລີ ແຂວງໄຊຍະບູລີ ທີ່ໂຮງຮຽນປະຖົມບ້ານດັ່ງກ່າວ.
ໂດຍມີພຣະ ອາຈານ ທອງເພັດ ແກ້ວມະນີວັນ ປະທານອົງການພຸດທະສາສະໜາສໍາພັນລາວ ເມືອງໄຊຍະບູລີ, ທ່ານ ມະນີວົງ ຂັນຕິສາລີ ຫົວໜ້າໜ່ວຍງານກິລາກາຍະກໍາ ຫ້ອງການສຶກສາທິການ ແລະ ກິລາ ເມືອງໄຊຍະບູລີ, ມີຄະນະສົງ, ພາກສ່ວນທີ່ກ່ຽວຂ້ອງ, ຄູ-ອາຈານ, ອໍານາດການປົກຄອງບ້ານ ພ້ອມດ້ວຍນ້ອງນັກຮຽນ ແລະ ຄອບຄົວທີ່ຂາດເຂີນທຸກຍາກເຂົ້າຮ່ວມ.
ເຄື່ອງທີ່ນໍາໄປມອບໃນຄັ້ງນີ້ປະກອບມີ: ປຶ້ມຂຽນ, ບິກ-ສໍດໍາ, ກະຕໍ້, ໝາກບານ, ມຸ້ງ, ເຄື່ອງນຸ່ງຮົ່ມ, ເຄື່ອງໃຊ້ໃນຄົວເຮືອນ ແລະ ອື່ນໆ. ເຄື່ອງດັ່ງກ່າວ ແມ່ນໄດ້ຮັບການສະໜັບສະໜູນຈາກ ອົງການພຸດທະສາສະໜາສໍາພັນລາວເມືອງໄຊຍະບູລີ, ວັດວາຕ່າງໆ ແລະ ຜູ້ທີ່ມີຈິດໃຈບຸນສັດທາພາຍໃນເມືອງ. ໂດຍໃຫ້ກຽດກ່າວມອບຂອງພຣະ ອາຈານ ທອງເພັດ ແກ້ວມະນີວັນ ແລະ ກ່າວຮັບໂດຍທ່ານ ສຸລິໄຊ ແສງມະນີ ຜູ້ອໍານວຍການໂຮງຮຽນປະຖົມ ແລະ ຄົວຄອບຂາດເຂີນທຸກຍາກພາຍໃນບ້ານຫ້ວຍເພາະ ໂດຍຊ່ອງໜ້າພາກສ່ວນທີ່ກ່ຽວ ຂ້ອງເຂົ້າຮ່ວມເປັນສັກຂີພິຍານ.
ໃນໂອກາດດຽວກັນນີ້ທ່ານ ສຸລິໄຊ ແສງມະນີ ຜູ້ອໍານວຍການໂຮງຮຽນປະຖົມຫ້ວຍເພາະ ກໍ່ໄດ້ຕາງໜ້າກ່າວສະແດງຄວາມຂອບອົບຂອບໃຈຄວາມຮູ້ບຸນຄຸນຢ່າງຫຼົ້ນເຫຼືອ ຕໍ່ຄະນະອົງການພຸດທະສາສະໜາສໍາພັນລາວເມືອງໄຊຍະບູລີ ທີ່ໄດ້ນໍາເອົາເຄື່ອງຊ່ວຍເຫຼືອມາມອບໃຫ້ໃນຄັ້ງນີ້ ຈະໃຫ້ຄໍາໝັ້ນສັນຍາວ່າຈະນໍາໃຊ້ເຄື່ອງດັ່ງກ່າວ ໃຫ້ເກີດຜົນປະໂຫຍດສູງສຸດ ແລະ ຫວັງຢ່າງຍິ່ງວ່າໃນໂອກາດໜ້າຈະໄດ້ຮັບເຄື່ອງຊ່ວຍເຫຼືອຈາກພາກສ່ວນດັ່ງກ່າວ ຕື່ມອີກ.
ແຫຼ່ງຂ່າວຈາກແຂວງໄຊຍະບູລີ
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment