ພະລັງງານໄຟຟ້າແສງຕາເວັນຖືເປັນພະລັງງານສະອາດທີ່ບໍ່ມີວັນໝົດເປັນ ແລະປະເທດເຮົາກໍ່ມີເງື່ອນໄຂໃນການພັດທະນາ ເນື່ອງຈາກເປັນເຂດຮ້ອນ ແລະມີແສງແດດຫຼາຍ ສະນັ້ນໃນປະຈຸບັນລັດຖະບານຈິ່ງພະຍາຍາມຊຸກຍູ້ບັນດາບໍລິສັດ ເພື່ອຂະຫຍາຍການສຶກສາຄວາມເປັນໄປໄດ້ ສ້າງພະລັງງານແສງຕາເວັນຢູ່ຫຼາຍໆຈຸດ ຫຼ້າສຸດນີ້ກໍ່ແມ່ນທີ່ເມືອງປາກງື່ມ ນະຄອນຫຼວງວຽງຈັນ.
ໂດຍໃນວັນທີ 14 ມີນາ 2018 ໄດ້ມີການມອບສິດເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາ, ເກັບກໍາຂໍ້ມູນ, ສໍາຫຼວດຄວາມເປັນໄປໄດ້ຂອງໂຄງການພັດທະນາພະລັງງານໄຟຟ້າຈາກແສງຕາເວັນ ເພື່ອສ້າງໂຮງງານ ໂຊລາເຊວທີ່ມີກໍາລັງຕິດຕັ້ງ 15 MW ຢູ່ບ້ານ ໂພນຂາມ ເມືອງ ປາກງື່ມ ນະຄອນຫຼວງວຽງຈັນ.
ໃຫ້ກຽດເຂົ້າຮ່ວມເຊັນສັນຍາ (MOU) ຄັ້ງນີ້ແມ່ນທ່ານ ຊັກໄຊ ຊາກະໂທກ ຜູ້ອໍານວນການ ບໍລິສັດ ລີນິວອາໂບ ເອັນເນີຈີ (ກໍາປູເຈຍ) ຈໍາກັດ, ທ່ານ ຍຸດທະສິດ ອິນທະລັງສີ ຜູ້ອໍານວຍການ ບໍລິສັດ ອິນໂຟເວສເມນາເຈີເມັນ ຈໍາກັດ, ທ່ານ ສາຍທອງ ສີໂຄດວິໄລ ຜູ້ອໍານວຍການ ບໍລິສັດ ລາວອິນເນີເທັກ ອິນເຕີເນຊັ່ນແນວ ຂາອອກ-ຂາເຂົ້າ ຈໍາກັດ, ທ່ານ ພູຂົງ ບັນນະວົງ ຫົວໜ້າພະແນກ ແຜນການ ແລະການລົງທຶນ ນະຄອນຫຼວງວຽງຈັນ, ທ່ານ ຊົງເລົາ ຢົງນູ ຫົວໜ້າພະແນກ ພະລັງງານ ແລະບໍ່ແຮ່ ແລະທ່ານ ວົງເດືອນ ບຸນຍະແສງ ເຈົ້າເມືອງ ເມືອງ ປາກງື່ມ ພ້ອມພະນັກງານລັດທີ່ກ່ຽວຂ້ອງ.
- ຈຸດປະສົງຂອງການສ້າງຕັ້ງໂຄງການ ໂຊລາຟາມ ນີ້ ເປັນພະລັງງານທົດແທນຈາກແສງຕາເວັນ, ເປັນພະລັງງານສະອາດ ແລະເປັນມິດຕໍ່ສິ່ງແວດລ້ອມ ເຊິ່ງໃນທົ່ວໂລກໄດ້ມີການນໍາໃຊ້ມາກ່ອນແລ້ວ ໂດຍສະເພາະແມ່ນບັນດາປະເທດທີ່ກໍາລັງພັດທະນາ ແລະພັດທະນາແລ້ວ.
Cr: Mahasone Magazine
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment