ເອກອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ຄົນໃໝ່ ຍື່ນສານຕາຕັ້ງ ຕໍ່ເລຂາ ທິການໃຫຍ່ ອາຊຽນ
ໃນຕອນເຊົ້າ ວັນທີ 17 ເມສາ 2018 ທີ່ ກອງເລຂາອາຊຽນ ນະຄອນຫລວງຈາກາກຕາ, ອິນໂດເນເຊຍ, ທ່ານ ເອກະພາບ ພັນທະວົງ ເອກອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອາຊຽນ ຄົນໃໝ່ ໄດ້ເຂົ້າຍື່ນສານຕາຕັ້ງຕໍ່ ທ່ານ ດາໂຕະ ລິມ ຈ໋ອກ ຮອຍ ເລຂາທິການໃຫຍ່ອາຊຽນ ເພື່ອ ເປັນເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈຳອາຊຽນ.
ໃນໂອກາດນີ້, ທ່ານ ເອກອັກຄະລັດຖະທູດ ໄດ້ສະແດງ ຄວາມຂອບໃຈ ຕໍ່ທ່ານ ເລຂາທິການໃຫຍ່ອາຊຽນ ທີ່ໄດ້ໃຫ້ການຕ້ອນຮັບ ໃນການຍື່ນສານຄັ້ງນີ້ ແລະ ໄດ້ສະແດງ ຄວາມຍິນດີຕໍ່ ທ່ານ ເລຂາທິການໃຫຍ່ອາຊຽນ ທີ່ຫາກໍໄດ້ດຳລົງຕຳແໜ່ງໃໝ່ ສໍາລັບສົກປີ 2018 - 2022. ພ້ອມນັ້ນ, ທ່ານ ເອກອັກຄະລັດຖະທູດ ກໍໄດ້ນຳເອົາຄວາມຢື້ຢາມຖາມຂ່າວ ອັນອົບອຸ່ນຈາກ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ມາຍັງ ທ່ານ ເລຂາທິການໃຫຍ່ອາຊຽນ.
ທ່ານ ເອກອັກຄະລັດຖະທູດ ຍັງໄດ້ຕີລາຄາສູງ ແລະ ເຊື່ອໝັ້ນ ຕໍ່ການຊີ້ນຳ-ນຳພາ ກອງເລຂາອາຊຽນ ຂອງ ທ່ານ ດາໂຕະ ລິມ ຈ໋ອກ ຮອຍ ໃນຖານະ ເປັນເລຂາທິການໃຫຍ່ອາຊຽນ ທີ່ມີຫົວຄິດປະດິດສ້າງ ໃນການປັບປຸງ ແລະ ສ້າງຄວາມເຂັ້ມແຂງ ໃຫ້ກອງເລຂາອາຊຽນ ໃຫ້ມີປະສິດທິພາບສູງ ໃນທ່າມກາງ ທີ່ອາຊຽນ ກໍາລັງຈັດຕັ້ງປະຕິບັດ ວິໄສທັດປະຊາຄົມອາຊຽນ 2025 ໃຫ້ປະກົດຜົນເປັນຈິງ. ພ້ອມທັງຕີລາຄາຕໍ່ບົດບາດ ຂອງກອງເລຂາອາຊຽນ ທີ່ຮັບຜິດຊອບການ ປະສານງານ ລະຫວ່າງ ອົງກອນຂອງອາຊຽນ ແລະ ບັນດາ ຂະແໜງການທັງ 3 ເສົາຄໍ້າ ປະຊາຄົມອາຊຽນ ໃນການຈັດຕັ້ງປະຕິບັດ ວິໄສທັດປະຊາຄົມອາຊຽນ 2025. ນອກຈາກນີ້, ທ່ານ ເອກອັກຄະລັດຖະທູດ ຍັງໄດ້ຊົມເຊີຍ ກອງເລຂາອາຊຽນ ຕໍ່ ການຊ່ວຍເຫລືອ ແລະ ໃຫ້ການຮ່ວມມືຕໍ່ບັນດາ ປະເທດສະມາຊິກອາຊຽນ ຕະຫລອດມາ ໂດຍສະເພາະ ໄດ້ໃຫ້ການຊ່ວຍເຫລືອ ທາງດ້ານເຕັກນິກ, ວິຊາການ ແລະ ຂໍ້ມູນ ໃນໄລຍະການ ເປັນປະທານອາຊຽນ ຂອງ ສປປ ລາວ ໃນປີ 2016 ແລະ ຫວັງວ່າ ຈະສືບຕໍ່ໄດ້ຮັບການຊ່ວຍເຫລືອ ຈາກກອງເລຂາອາຊຽນ ໃນໄລຍະຕໍ່ໄປ.
ພ້ອມດຽວກັນນີ້, ທ່ານ ເອກອັກຄະລັດຖະທູດ ກໍຍັງຊຸກຍູ້ໃຫ້ ທ່ານ ເລຂາທິການໃຫຍ່ອາຊຽນ ສືບຕໍ່ສະໜັບສະການຈັດຕັ້ງ ແຜນປະຕິບັດງານແຜນງານຂໍ້ລິເລີ່ມ ເພື່ອການເຊື່ອມໂຍງອາຊຽນ ສະບັບທີ 3 ແລະ ແຜນແມ່ບົດ ເພື່ອການເຊື່ອມຈອດອາຊຽນ 2025 ເພື່ອແນ່ໃສ່ ການຮັດແຄບຄວາມແຕກໂຕນ ດ້ານການພັດທະນາ ພາຍໃນອາຊຽນ. ພ້ອມທັງຊຸກຍູ້ໃຫ້ກອງ ເລຂາອາຊຽນ ສືບຕໍ່ຂົນຂວາຍ ບັນດາຄູ່ເຈລະຈາ ແລະ ຄູ່ຮ່ວມພາຍນອກ ເພື່ອໃຫ້ການສະໜັບສະໜູນ ບັນດາໂຄງການຝຶກອົບຮົມ ໃຫ້ນັກການທູດໜຸ່ມນ້ອຍ ຂອງປະເທດອາຊຽນໃໝ່ (CLMV) ເນື່ອງຈາກວ່າ ເປັນໂຄງການທີ່ສຳຄັນ ສຳລັບການພັດທະນາຊັບພະຍາກອນມະນຸດ ໃນໄລຍະຍາວ. ການຕ້ອນຮັບຂອງ ທ່ານ ເລຂາທິການໃຫຍ່ອາຊຽນ ໃນຄັ້ງນີ້ ແມ່ນເຕັມໄປດ້ວຍ ຄວາມອົບອຸ່ນ ແລະ ສະໜິດສະໜົມ ພ້ອມທັງເຫັນດີ ຕໍ່ຄຳສະເໜີ ຂອງທ່ານ ເອກອັກຄະລັດຖະທູດ ແລະ ໄດ້ຍືນຍັນວ່າ ໃນໄລຍະຜ່ານມາ ສປປ ລາວ ກໍໄດ້ປະກອບສ່ວນຢ່າງຫລວງຫລາຍ ໃນການສ້າງປະຊາຄົມອາຊຽນ ຕະຫລອດມາ. ພ້ອມນີ້, ທ່ານ ເລຂາທິການໃຫຍ່ອາຊຽນ ຍັງໄດ້ຊົມເຊີຍ ຕໍ່ການພັດທະນາເສດຖະກິດ-ສັງຄົມຂອງ ສປປ ລາວ ວ່າມີ ລະດັບການຂະຫຍາຍຕົວທີ່ດີ ແລະ ໝັ້ນຄົງ, ພ້ອມທັງໃຫ້ຄຳໝັ້ນສັນຍາວ່າ ຈະສືບຕໍ່ໃຫ້ການຊ່ວຍເຫລືອຕໍ່ ສປປ ລາວ ໃນໄລຍະຕໍ່ໄປ.
-----------------
Laos Update : ໃຫ້ທ່ານຫຼາຍກວ່າຂ່າວ
0 comments:
Post a Comment